Амралтын өдрүүдэд ихэнх нутгаар их хэмжээний цас орж, замын нөхцөл байдал хүнд байв. Тухайн өдрүүдэд буюу 2018.01.06-2018.01.07-ны өдрүүдэд Замын цагдаагийн албаны Жижүүрийн шуурхай удирдлагын хэлтэст нийт 506 дуудлага мэдээлэл бүртгэгдсэнээс зам тээврийн ослын 387 дуудлага бүртгэгдсэн бөгөөд ослын улмаас 1 хүний амь нас хохирч, 18 хүн хүнд, хөнгөн байдлаар гэмтэж бэртжээ. Тухайн өдрүүдэд зам тээврийн осолд бага насны хүүхэд өртөөгүй байна.
Мөн гудамж замд хийсэн хяналт шалгалтаар согтууруулах ундааны зүйл хэрэглэсэн үедээ тээврийн хэрэгсэл жолоодсон 71 зөрчлийг илрүүлэн шалгаж байна.
Орон нутгийн замд ноцтой зам тээврийн ослын улмаас 1 хүний амь нас хохирчээ.
Бүртгэгдсэн зам тээврийн осол, хэргийг хэлбэрээр нь авч үзвэл явган зорчигч мөргөж гэмтээсэн 5 осол, мөргөлдөх хэлбэрээр 21, үл хөдлөх зүйл мөргөсөн 1 осол тус тус бүртгэгдсэнийг шалгаж байна.
Тухайлбал:
Өчигдөр орсон цас болон цасан шуурганы улмаас Өмнөговь аймгийн орон нутаг руу зорчих хөдөлгөөнийг түр хугацаагаар хязгаарласан бөгөөд өнөөдрийн /2018.01.08/ байдлаар хөдөө, орон нутагт хаасан зам, даваа байхгүй хөдөлгөөн хэвийн үргэлжилж байна.
Гэсэн хэдий ч замын гадаргууд ихээхэн халтиргаа гулгаа үүссэн байгаа тул өдрийн цагт хөдөлгөөнд оролцохдоо замын нөхцөл байдалд хурдаа зөв тохируулах, үзэгдэлт хангалтгүй буюу шөнийн цагаар хөдөө, орон нутгийн замд зорчихгүй байхыг зөвлөж байна.
Мөн нийслэл хотын халтиргаа, гулгааг арилгах зорилгоор тус албаны Техник, замын хяналтын хэлтсээс Улаанбаатар хотын Шуурхай удирдлага, зохицуулалтын төвтэй хамтран 6 дүүргийн хэмжээнд 25 гол гудамж, замуудад 66 тн бодис, 50 тонн давсыг Хан-Уул дүүргийн ТЭЦ-3, Ажилчдын гудамж, Яармагийн гүүрний уулзвар, Эрчим хүчний шинэ замын уулзвар, Москвагийн гудамж, Баянхошууны гудамж, Хувьсгалчдын гудамж, Сонсголонгийн зам, Л.Энэбишийн өргөн чөлөөний замд цацуулж ажиллажээ.
ЗЦГ
