Уул уурхайн сайд асан Д.Гануягийн охин Г.Номуундарь саяхан өөрийн цахим хуудсаараа дамжуулан "монголын нөлөө бүхий эрх мэдэлтэн, хөрөнгөтнүүдийн хүүхдүүд хүчирхийлэл үйлдэж, хар тамхи хэрэглэдэг" тухай мэдэллийг нийтэд дэлгэсэн юм. Үүнтэй холбоотойгоор түүний өмгөөлөгчид өнөөдөр мэдээлэл хийлээ.
Юун түрүүнд түүний нийтэд дэлгэсэн хэрэг дээр өмгөөлөгч Ц.Баасандоржоор ахлуулсан хуулийн баг ажиллаж байгаа бөгөөд тэд эхний ээлжинд хүчингийн хэрэг дээр ажиллаж эхэлсэн байна. Харин гэмт хэргийн нөхцөл байдал тогтоогдоогүй байхад хуулийн байгууллагууд асуудалд анхаарал, болгоомжгүй хандаж байгааг тэд энэ үеэр онцоллоо.
Учир нь охины хууль ёсны эрхийг хамгаалж, түүний аав оны өмнө Монгол Улсын Ерөнхий прокурорт хандсан ч Прокурор уг асуудалтай холбоотойгоор ташаа мэдээлэл тарааж байна гэж мэдэгдлээ. Учир нь хэрэг эцэслэн шийдэгдээгүй байхад гэмт хэргийн нууцыг задалж мэдээлэл хийсэн. Хохирогчийн зүгээс гомдол гаргаагүй, эрүүгийн хэрэг үүсээгүй байхад хуулийн байгууллагаас мөрдөн байцаалтын нууцад хамаарах мэдээлэл задруулж, байр сууриа илэрхийлсэн нь хууль зөрчсөн үйлдэл болж байгааг хэлсэн юм.
Мөн Цагдаагийн байгууллага гэрчүүдийг байцаахдаа өмгөөлөгч нарыг оролцуулахгүй байгаа нь хууль зөрчиж байгаа хэрэг гэдгийг ч онцоллоо.
Г.Номундарийн бичлэгт дурьдагдсан нэр бүхий 30 гаруй хүүхдийн дийлэнх нь гадаад улсад гарсан, эх орондоо байгаа хүүхдүүдийн ихэнхээс нь хар тамхи илэрсэн байна.
Гэрчүүдийн өгсөн мэдүүлгээр бичлэгт дурдагдсан этгээдүүд хэрэг гарах үед байлцсан гэдэг нь тогтоогдсон ч хүчингийн хэрэгт холбоотой хоёр этгээдийг эрэн хайх ажиллагааг явуулж, эрүүгийн хэрэг үүсгээгүй учраас дээрх этгээдүүд зугтсан байна. Мөн олон нийтийн сүлжээгээр “Би хэрэг хийгээгүй” гэх тайлбар хийж байгааг хэллээ. Харин хэргийн талаар болоод гэмт этгээдүүдийн нэр усыг тодорхой зарлах боломжгүй байгааг онцоллоо.
Бид энэ мэдээллийн үеэр өмгөөлөгч нарын ярьсан ярилцлагыг тун удахгүй дэлгэрэнгүй хүргэх болно.
С.ШҮРЭНЧИМЭГ