Өвлийн олимпийг зорих тамирчдын хувцас, хэрэглэлий өнөөдөр гардуулан өглөө.
Энэ удаагийн өвлийн олимпийн наадамд манай улсаас гүйлтийн цанын эрэгтэйчүүдийн 10 км-ын зайд Б.Ачбадрах, эмэгтэйчүүдийн 15 км-ын зайд Ч.Отгонцэцэг нар оролцох бол паралимпийн цанын төрөлд Б.Ганболд өрсөлдөх эрхээ авсан юм. “Пёнчан-2018”-д эх орноо төлөөлөн оролцох баг тамирчидад олимпийн нээлт хаалтын ёслол болон бэлтгэлд өмсөх иж бүрэн хувцсыг үндэсний үйлдвэрлэгчид бүтээжээ.
Тамирчдын куртикийг “Төмөр трейд” ХХК,”Нано вүүл” компани ноолууран малгай, ороолт, бээлий, “Цэрэн наран” компани “Joma” брэндийн бэлтгэлийн нимгэн хувцас харин арьсан цүнхийг “Их хэнгэрэг” компани урлажээ.
Өвлийн олимпод хүч сорих манай гурван тамирчин Хандгайт дахь цанын баазад бэлтгэл сургуулилтаа хангаж байна. Тэд ирэх сарын эхээр олимп болох Пёнчан хотыг зорих юм.
