Япончууд Монголчуудад таагүй хандах болсон нь улам гүнзгийрч эхэлжээ. Анх Д.Дагвадорж аваргыг "шахаж" бусад монголын сумочдод сургамжийн хичээл "заасан". Д.Дагвадорж аваргын хувьд бага зэрэг дэвтэй сумочдыг дарамтлаагүй. Харин ресторанд өөр лүү нь эвгүй зан авир гаргасан япон иргэнийг зодож танхайрсны улмаас хөөгдсөн. Энэ үйлдэл бусад монгол аваргуудыг дайрч байна.
Өнгөрсөн жилийн сүүлчээр гэхэд л нутаг нэгтнээ зодсон хэргээр Ёкузано Амаг мөн л шахаж, дарамталж, зодгийг нь тайлуулсан бол ёкузано М.Даваажаргалыг ийм хувь заяа хүлээж байна. Түүнийг шүүх, цагдаа, Сумогийн холбоо дуудаж тайлбар авах, хэвлэл мэдээлэл нь түүн лүү "давшсан" мэдээлэл түлхүү нийтлэхээс гадна, түүнийг ална гэж заналхийлсэн нэргүй захидлыг сумогийн ордонд гардуулсан байдаг. Энэ бол зүгээр л нийгмийн дарамт, шахалт юм. Энэ сарын башёд зодоглоогүй нь ч үүнтэй холбоотой гэж үзэж байна. Цөөхөн монгол сумочдын танхайрсан зодооны тухай яриагаа хальж, нийт монголчууд нийгмээрээ архинд автсан, архи уухаараа хүнээ алддаг тухай сурвалжлагыг ч сонин хэвлэлээр, тэр дундаа Монгол бөхчүүдийн амжилт үзүүлдэг, монголчуудын шимтэн үздэг сумо бөх дундуур дамжуулсан.
Хөрөнгө мөнгөө, цаг заваа зарцуулан байж Монголд томилолтоор ажиллахдаа Сумо нэвтрүүлэг дундуур цацах нэвтрүүлэг бэлдсэн байдаг. Тэр нь монголчууд хэрхэн архинд живж буй тухай, архи уухаараа хүнээ алддаг тухай, гэмт хэргийн дийлэнх нь архинаас үүдэлтэй тухай сурвалжлага байсан. Түүнийгээ сумогийн барилдаан дундуур цацсаныг та бид харсан, зарим нь сонссон. Энэ бол Монголчуудад хандах япончуудын хандлага хэрхэн өөрчлөгдөж буйг илтгэнэ.
Дараагийн алхам нь сумогоос бүр хальсан. Тэр нь эзэн Чингисийн зурагаар хавтсаа чимсэн комик ном гаргахдаа духан дээр эр бэлэг эрхтэн зурж - "Энэ бол боов" гэсэн тайлбартайгаар хэвлүүлснийг үзэгчид санаж буй. Япончууд ингэж л дарамталж, бас доромжилж байна. Тэмцэл хийсний хүчинд комик номыг худалдаанаас татуулж хураалгасан ч, доромжлол нь үлдсэн.
Ц.ХИШГЭЭ
