"Эрдэнэс-Таван толгой” ХК Төлөөлөн Удирдах Зөвлөлийнхөө шийдвэрийн дагуу Монгол Улсын Хөгжлийн банкнаас олгосон 200 сая ам.долларын өрийг бүрэн төлж барагдуулжээ.
Тус компани 2-р сарын 28-нд Хөгжлийн Банкинд төлөх ёстой мөнгөнийхөө 50 саяыг төлж барагдуулснаа мэдэгдээд байсан юм. Тэгвэл өнөөдөр үлдсэн 50 сая долларыг төлж, бүрэн өргүй болжээ.
Хөгжлийн банкнаас авсан зээлийн 100 сая ам.долларыг хуваарьт хугацаанаас нь өмнө буюу 2017 оны 10 дугаар сарын 31-ний өдөр барагдуулсан байдаг.
Уг 200 сая ам.долларын зээл нь Монгол Улсын Засгийн Газрын 2012 оны шийдвэрээр "Хүний Хөгжил сан”-гаар дамжуулж иргэн бүрт олгосон халамжийн мөнгөний тодорхой хэсгийг бүрдүүлэх, компанийн эргэлтийн хөрөнгийг санхүүжүүлэх зорилгоор "Эрдэнэс-Таван толгой” ХК-д олгосон зээл юм.
Одоо тус компани бүр мөсөн өргүй болсон учраас амласан ёсоороо иргэдийн 1072 ширхэг хувьцааг амилуулж Хөрөнгийн бирж дээр худалдаалах шаардлагатай болж байна.
Харин та хувьцаагаа амь оруулахын тулд юун түрүүнд аль нэг брокер, диллерийн компани дээр очиж үнэт цаасны данс нээлгэж, хувьцаагаа баталгаажуулахыг зөвлөе. Ингэснээр та хувьцаа амь орсон цагт арилжаалах боломжтой болох юм.
“Эрдэнэс Таван Толгой” ХК-ийн нийт 15 тэрбум ширхэг хувьцаатай бөгөөд 20 хувийг иргэд эзэмшиж байгаа бол үлдсэн 80 хувийг Монгол Улсын Засгийн газар, ААН-үүд эзэмшиж байгаа юм.
С.ШҮРЭНЧИМЭГ
