Сүүлийн жилүүдэд манай улсад гадаадын хүүхэлдэйн кино, анимэйшн олноор гарч тэр хэрээр хүүхэд, багачууд ч гадаадын соёлын нөлөөнд автах болсон билээ. Тиймээс Монголынхоо түүх, соёл, үндэсний үзлийг хүүхэд багачуудад суулгах, түүхийн мэдлэг олгох үүднээс “Монголын нууц товчооны” эхний 8 бүлэг буюу 1146-1206 он хүртэлх түүхэн үйл явдлыг "Чингис хаан" анимэйшнд тусгаж өгчээ.
Уг киног бүтээхэд нийт 8 жил зарцуулсан байна. Эхний хоёр жилд нь Их эзэн Чингис хааны төрсөн нутаг Дэлүүн болдог, Хар Зүрхний хөх нуураар жилийн дөрвөн улиралд аялж, байгалийн тогтоцын судалгаа хийсэн байна.
Мөн нэг жил 8 сарын хугацаанд зохиолын ерөнхий судалгаа хийжээ. ЕБС-ийн сурагчдын дунд “Монголын нууц товчоо” бүрэн гүйцэт уншсан хүүхэд ховор байдаг учраас киног ойлгомжтой, энгийн үг хэллэгтэй бүтээхийг зорьсон байна.
Киног бүтээхэд ерөнхий найруулагч Б.Тэнгис ажилласан бол продюссероор ТВ9 телевизийн нэвтрүүлэгч М.Ундрам ажиллаж, тэднээс гадна 1000 орчим хүн гар бие оролцжээ. Тухайлбал, олныг хамарсан хэсэгт 500 цэрэг дуу оруулсан бол симфони найрал хөгжим, Морин хуурын чуулга хамтран тоглосон байна.
Хамгийн гол нь киног Уолт Дисней болон бусад томоохон кино компаниудын стандартын дагуу хийсэн байна. Тиймээс кино багийн зүгээс Бээжин, Шанхай, Хонгконгод бүтээлээ танилцуулсан бөгөөд гадаадын үзэгчдийн дунд ихээхэн хүлээлт үүсчээ.
Кино хэд хэдэн дуутай бөгөд Тэмүүжиний дууг Харанга хамтлагийн аргил гитарчин, СГЗ Ц. Чулуунбат, Бөртэ хатны дууг дуучин Маралжиноо, Агиймаа, Эгшиглэн нар хамтран дуулсан байна.
Кинонд нэрт дуу оруулагч ЖДарамсүрэн, Н.Нэргүйбаатар, Т.Цэмпилмаа нарын олон эрхмүүд дуу оруулжээ.
Анимэйшныг бүтээхийн тулд уран бүтээлчид хоёр Ерөнхийлөгч, гурван Ерөнхий сайд, 25 УИХ-ын гишүүн болон бизнес эрхлэгчдэд хандсан ч нэг нь ч дэмжлэг үзүүлээгүй байна.
Гэсэн хэдий ч уран бүтээлчдийн стэгэл, зүтгэлээр амжилттай бүтсэн "Чингис хаан" анимэйшн 3-рс арын 31-нд нээлтээ хийж кино театруудаар гарч эхэлсэн юм. Тиймээс эрхэм үзэгч, уншигч та бүхэн анишмэйшнээр дамжуулж хүүхдүүддээ эх түүхээ мэдүүлэхийг хүсвэл "Чингис хаан" анимэйшнийг үзүүлээрэй.
С.ШҮРЭНЧИМЭГ
