(Дурсамж зөвлөгөө)
Бие махбодь, оюун санаа , сэтгэл зүйн хувьд эрүүл байж хүн эрүүл байдаг. Тиймээс иргэн бүр анхан шатны эрүүл мэндийн мэдлэг боловсрол эзэмшсэн байх нь чухал. Хүүхэд төдийгүй нас бие гүйцсэн хүмүүс ч энэ талын мэдлэггүй байх нь олонтаа таарна. Зүрх судас, мэдрэл, тулгуур эрхтэн, ходоод бөөр давсагны архаг өвчин нь заримдаа чих хамар хоолойн өвчний үүсэлтэй болохыг тэр бүр мэддэггүй. Бас өвчнөө гадарладаггүй тохиолдол олон бий. -Таны хамар ч юм уу ? хоолой ч юм уу ? өвчтэй байна гэхэд, – Миний хамар зүгээр , хоолой өвддөггүй гээд өөрийнхөөрөө зүтгээд байх нь эмчид тийм ч таатай сэтгэгдэл төрүүлдэггүй. Цусны даралт ихтэй өвчтөн, -Миний тархины судас нарийсч тархины цусан хангамж дутагдсан гэж өөртөө онош тавиад байхаас биш яагаад судас нарийссан бэ гэдгийн шалтгааныг олохыг хичээдэггүй. Гэтэл шалтгаан нь хамартай холбоотой байх тохиолдол байдаг юм. Иймд суурь өвчнийг зөв олж оношилж, эмчлэх нь өвчнийг бүрэн анагаах суурь болдог. Мэдээж хүн зөв сэтгэдэг байх ёстой. Тархи мэдрэл бүх эрхтэнг удирддаг ч бас мэдрэл нь бусад эрхтний өвчлөлөөс болж үрэвсдэг болохыг мэдэж байх хэрэгтэй. Энэ дашрамд нэгэн ховорхон тохиолдол дурсъя. 2О17 оны 5 дугаар сарын 18-нд Алтантунгалаг гэгч 40 настай эмэгтэйг нэг жолооч хүүхэн авч ирж үзүүлэв. Гэнэт ярьж чадахаа больчихсон гэж тайлбарлалаа. Хэд хэдэн төвийн эмнэлэгт үзүүлсэн. Нэмэр болсонгүй. Таныг хүнээс сонсоод зорьж ирлээ. Би одоо ажилтай, яарч байна гэж хэлчихээд сандруухан гараад явчих нь тэр. Үлдсэн эмэгтэй өөрийн хаяг, утсаа бичиж өгөв. Бичгээр тийнхүү бид харьцлаа. Өмнөө суулгаад ажиглавал, бүх бие нь салганан чичирч, биеийнх нь хар хөлс нь чийхарч, харц нь айдас түгшүүртэй, нулимас нь гоожиж байлаа. Асуухад өглөө босоход л ярьж чадахаа больчихлоо гэж бичив. Үзлэг хийхэд чих хамар хоолойн эрхтний талаас онц өөрчлөлтгүй байв. Ажил, гэр бүлийг лавлахад аав , ээж , бага охины хамт Багануурт амьдардаг. Өөрөө хотод оёдолчин хийдэг, том охин нь Солонгос улсад сурдаг гэж бичив. Нойр хэр байгааг нь асуухад, ер нь нойронд муу, сүүлийн тав хоног унтаагүй, өглөө 9 цагаас орой 9- 10 цаг хүртэл ажилладаг гэж бичлээ. Би-, За чи мэдрэлийн гүн ядаргаанд оржээ. Чи өөртөө хуримтлагдсан бүх зовлонгоо бүрмөсөн март. Тэгж чадвал миний дүү эдгэнэ, эс чадваас насаараа хэлгүй болно. Би ямар ч болсон ойр зуурын эмчилгээ хийнэ. Харин надад итгэ. Сэжгээр өвдөж, сүжгээр эдгэрдэг гэж сонссон уу. Алив, сэтгэлийнхээ угаас нэг сайхан инээчих гээд, муухан инээлгэв. Тэгээд толгой, хүзүү, гүрээ, хэл амны дасгалыг 25 минут түүнд хийлээ. Өвчтөний хөлрөлт тэр дороо багасаж, улмаар үүрэглэж эхлэв. Тэр сандал дээрээ 30 орчим минут унтаад цочиж сэрэв. Тэгэхээр нь , -За одоо ярь гэхэд бүлтэлзэн, эв хавгүй авиа гарав. Амыг ангайлгаж хэлийг нэг удаа хүчтэй дугтрав. За ярь гэсэн чинь хэлээ аман дотроо гүйлгэж байна . Заа яав? хэл чинь алга болчихож уу? Гэхэд өвчтөн инээв. Одоо ярь айх юмгүй яриач гэж намайг уцаарлангуй шахахад шүлсээ залгив. -За яав хоолой чинь тасарчихаж уу? Гэхэд дахин инээж зөв аялгатай үг хөнд хөнд гэж зөөлөн дуугарав. Хэл чинь зүгширч байна 15 минут 35 үсгийг чангаар хэл гэл ээ. Нэлээд сууж байснаа З, Ж, Р, Т, Н, Ү, У үсгэнд тээглэж байснаа ээрэн хэлж эхлэв. Ядарч байгаа бололтой тул дасгалыг зогсоож гэртээ хариад цаг дутамд таван минут ярих, нойр, ажил амралт зохицуулах, бүжгэн жүжиг, инээдмийн жүжиг сайн үзэж байх, бас мэдрэл сэтгэцийн эмчээс зөвлөгөө авахыг зөвлөлөө. Учир нь манай өрөөнөөс охин руугаа утасдан нам дуугаар зүгээр боллоо гэж хэлэхэд охин нь надад талархал илэрхийлэв. Энэ тохиолдол нь цэвэр мэдрэлийн системийн ядаргаатай холбоотой байлаа. Эмч хүн өвчтөнг өөрөөсөө холдуулах биш харин өөрөө ядарталаа өвчтөнтэйгөө ажиллах л хэрэгтэй…
ЭХ СУРВАЛЖ : HIDOCTOR.MN
