Завхан аймгийн Улиастай хотын 10 жилийн сургуулийн 9-р ангиас хойш тэд захидлаар харилцсан байна. Сурагч, оюутан цагаас хойш ч бие биенээсээ алс байх үедээ ч захидлаа үргэлжлүүлэн бичсэн Н.Багабанди, А.Оюунбилэг нар нэг л өдөр ном болгон хэвлүүлэх сэдэлд автсан байна. Монголын соёл, урлаг, утга зохиолын том төлөөлөгч, ардын уран зохиолч Лодонгийн Түдэвийн үг ч гал дээр шар тос асгажээ. -Утга зохиолд захидлын төрөл жанр гэж бий. Баримтат зохиол гэсэн үг. Хэрвээ та хоёр захидлаа эмхэтгэж, хавтаслан ном болгохыг хүсвээс өвгөн ах нь шүүн тунгааж, номны өмнөтгөлийг бичиж өгье гэж хэлсэн байна. Энэ үгэнд урамшсан Н.Багабанди, А.Оюунбилэг нар захидлаа он цагийн дарааллаар байрлуулж, номоо хэвлүүлсэн байна.
Захидал нь 9 боть ном болжээ. Захидал нь хоёр хүний сэтгэлийн үгийг илчлэхээс гадна, өнгөрсөн цаг, нийгмийн хөгжил хөдөлгөөний тусгал, толь болсон нь сонирхол татжээ. -" Ном бол хаан ширээнээс ч үнэтэй" . Тиймээс энэхүү захидлын эмхэтгэл бол бидний гэр бүлийн нандин судар юм гэдэг үгээр Монгол улсын хоёрдахь ерөнхийлөгч Н.Багабанди номын нүүр хуудсаа нээсэн байна.
Энэхүү 9 боть номоо Н.Багабанди, Оюунбилэг нар номын худалдаагаар огт зарахгүй байгаа бөгөөд, зөвхөн танил тал, найз нөхдийнхээ хүрээнд борлуулж буй ажээ. Сонссоноор, захидлын номыг хүлээн авсан эрхмүүд 1 сая төгрөг төлөхдөө ч сэтгэл хангалуун үлдэж буй сурагтай.
Ц.ХИШГЭЭ