Гацуурт ХХК-ийн үүсгэн байгуулагч Л.Чинбат, УИХ-ын гишүүн Б.Бат-Эрдэнэ. Энэ хоёр эрхэм бол тэргүүн нь, арслан Мөнх-Эрдэнэ, заан Сайнбаяр нар гүйцэтгэх захирал. Бөхийн холбоо ийнхүү 2 удирдлагатай болсон. Тэднийг дагаж бөхчүүд нь ч талцаж хуваагдсан. УИХ-дахь 2 дархан аварга нь ч хоёр талдаа гарсан. Нөхцөл байдал нэгэнт хяналтаас гарч эхэлсэн тул төр анхааралдаа авахад хүрсэн. Эхний удаад Бөхийн өргөөнөөс маргалдагч аль аль талыг нь гаргаж, тус өргөөг төр хяналтандаа авсан.
Дараагийн алхам нь маргалдагч хоёр талыг ерөнхийлөгчийн тамгын газрын дарга З.Энхболд тус тусад нь хүлээн авч, эвлэрэх шаардлага тавив. Эс эвлэрвээс Бөхийн өргөөг улсын хөрөнгөнд эргэж бүртгэж авах тухай шийдвэрээ танилцуулснаар хоёр тал эвлэрэх алхам тавигдсан байна. Хэн хэн нь Бөхийн ордоноо төрд тушаасан, өмчгүй хөрөнгөгүй төрийн бус байгууллага хүлээж авахаас өөрсдөө татгалзав. Ийнхүү хөрөнгөө алдахаас болгоомжилж, эвлэрлийн санамж бичигт гарын үсэг зурж, хамтарсан хурлаа ёс зүй, хууль дүрмийн дагуу хийхээр тохиролцлоо.
Арав орчим жил үргэлжилсэн Бөхийн холбооны удирдлага, Бөхийн Өргөөний тухай маргаанд цэг тавих цаг ойрсон байна. Бөхийн холбооны удирдлагаар сонгогдсон Л.Чинбат дахин нэр дэвшихээс татгалзсан бол Бат-Эрдэнэ аварга ямар нэгэн мэдэгдэл хараахан хийсэнгүй. Ямар ч гэсэн бөхийн маргааныг эцэслэн, нэгдсэн Их Эв Эе хуралдуулахад Монгол улсын ерөнхийлөгч Х.Баттулга, Ерөнхийлөгчийн тамгын газрын дарга З.Энхболд болон өмнө нь тэргүүнээр сонгогдоод байсан Л.Чинбат тэргүүн нарын чармайлт ихээхэн нөлөөлж, үүргээ гүйцэтгэсэн байна.
Д.ЖАРГАЛ
