НӨАТ-ийн сугалааны долоо дахь удаагийн тохирол энэ сарын 20 нд болж нийт 24,564 азтан тодорсон. Харин сугалааны супер шагнал болох 400 сая төгрөгийн эзэн тодорсон ч азтан баримтаа бүртгүүлээгүй учир хэн гэдэг хүн болох нь тодорхойгүй байсан юм. Тэгвэл өчигдрөөс эхлэн олон нийтийн сүлжээгээр 400 саяын эзэн тодорлоо гэх мэдээлэл гарч эхэллээ. Тодруулбал, Дорноговь аймгийн Худалдан авах ажиллагааны албаны дарга А.Энхжаргал гэх залуу Улаанбаатар хотод ажлаар яваад Сайншанд буцах замдаа Амгаланд байрлах "Оргил" худалдааны төвөөс замынхаа хүнсийг авсан нь азтан болгожээ гэх мэдээлэл тараад буй юм.
Харин энэ талаар өөрөө цахим хэвлэлд “Надад ямар нэгэн батлах баримт алга. Би мэдэхгүй байна. Ямартай ч анх мэдээлэл цацсан Дорноговь аймгийн сайттай холбогдоё ” гэсэн хариуг өгчээ.
Одоогоор НӨАТУС-т азтан болсон гэх иргэний худалдан авалтын баримт нь байхгүй бөгөөд Ebarimt.mn-ээс сугалааны тохирлын мэдээлэл ирээгүй гэж албаны хүмүүс мэдээлж байна.
А.САЯН