Таван толгойн асуудлыг нарийвчлан судалсан хүний нэг бол УИХ-ын гишүүн Л.Эрдэнэчимэг. Эрдэнэчимэг гишүүн УИХ-ын дарга З.Энхболд нар нэг ижил байр суурьтай. Тэд Таван толгойг "Энержи ресурс" алдаж болохгүй гэсэн байр суурин дээр хатуу зогсдог. Улс орны эрх ашигт харшилсан гэрээ гэж үздэг. Тиймээс ч Э.Энхсайханыг засгаас хөөх, Ч.Сайханбилэгийн засгийн газрыг унагах хүртэл асуудлыг тавьж байсан түүх саяхных.
"Таван толгойн гэрээг цааш нь үргэлжлүүлнэ гэж хэлж байгаа. Энэ бол ММС болон "Энержи ресурс", "Шинхуа" группт Таван толгойгоо өгөх гэж байна гэж харагдаж байна. Энэ компанийг дампуурлаас аврах ганц арга зам нь Таван толгойн гэрээг үргэлжлүүлэх гэж би хардаж байна" гэж Эрдэнэчимэг хэвлэлд ярилцлага өгөхдөө онцоллоо.
Тиймээс энэ гэрээг үргэлжлүүлэхийг эсэргүүцдэг бүлэг улс төрийн хүрээнд бий болсон. Энэ бүлэгт хэн хэн байдаг вэ? гэдэг нь тодорхой. Энэ бүлэгт З.Энхболд, Л.Эрдэнэчимэгээс гадна Женко Баттулга багтдаг. Өнөөдрийн улс төрийн хэлмэгдүүлэлт, гадуур хийж буй баривчилгаа нь Таван толгойтой л холбоотой улс төрийн захиалгат үйл ажиллагаа гэдгийг Эрдэнэчимэг нуусангүй. Түүний үзэж байгаагаар ММС -ийн ард Петровис, Шунхлай, MCS-ээс гадна, Монголын нам дамнасан улс төрийн бүлэглэл мөн Хятадын улс төр, бизнесийн томоохон бүлэглэл бий гэж хэллээ. Том "зодоон " эхэлсэн.
Дөнгөж эхэлсэн нь энэ "зодоонд" хэн ялахыг нь удахгүй харна. Харин жирийн иргэд бүү хохироосой. Улс орон бүү нэрвэгдээсэй, билээ.
Д.САЯН