"Бөхчүүдийн маргаан тасардаггүй". Ингэж хэлэхээр бөхчүүд маргаагүй гэнэ. Хоёр гуравхан бөх, тухайлбал Дархан аварга Х.Баянмөнх, А.Сүхбат хоёр л үймүүлээд байна гэх мэдээллийг нэг тал нь цацчихаад суух юм.
Дархан аварга, УИХ-ын гишүүн Б.Бат-Эрдэнэ бол Бөхийн холбооноос ч, Бөхийн өргөөнөөс ч холдоё гэдгээ илэрхийлсэн гэх аман яриа давхар газар авчээ.
Нөгөө тал нь - Бөхийн өргөөг Бөхийн Холбоонд огт бүртгээгүй байна. Үүнийг тодруулах учиртай. Бөхчүүдийн өмчийг хэн завшив? Сөргөлдсөн хоёр тал эвлэж нэгдэж хуралдана гэж яаж байдаг юм бэ? гэх хариуг ч Баянмөнх аваргын зүгээс хэлж буй.
Хоёр тал нийлж, нэгдэж, мөддөө хуралдахгүй янзтай. Маргааныг таслахаар Монгол улсын ерөнхийлөгч Х.Баттулга, тамгын газрын даргаараа дамжуулан сөргөлдөгч хоёр талыг тус тусад нь авч уулзсан. Хэдэн жил дамнасан бөхчүүдийн маргааны үндэс нь Бөхийн Холбооны жинхэнэ тэргүүн хэн бэ?, Бөхийн Өргөө хэнийх вэ? гэдэг л асуудал. Үүнийг л шийдэж, тасалж, нэг мөр шийдэхээр Монгол улсын ерөнхийлөгч Х.Баттулга бөх хүний хувьд ч, төрийн тэргүүний хувьд ч оролцсон гэж харсан.
Үнэндээ маргаан дагуулсан Оюутолгойн гэрээний дэргэд шийдэх цөхөх юмгүй асуудал. Гэтэл байдаггүй, шийдэж чаддаггүй. ЕТГ-ын дарга З.Энхболдоор дамжуулан лүндэнгээ буулгасан. Маргаанаа тасал, эвлэж нэгдэж хурлаа хий, хурлаасаа нэгдсэн нэг шийдвэр гарга. Нэг л тэргүүн, нэгдсэн нэг Цэцийн гишүүд, нэг л гүйцэтгэх захиралтай бол гэж захиргаадсан. Эс бөгөөс нийт санхүүжилтын 80 хувийг улсын төсвөөс гаргасан учир Бөхийн өргөөг буцааж улсын өмчид бүртгэхээ мэдэгдсэн. Арга хэмжээндээ тодорхой хугацаа заасан эсэхийг хэлж мэдэхгүй байна. Ямар ч гэсэн бүтэн 30 хоногийг ардаа орхилоо. Маргаан тасардаггүй, эвлэж хуралддаггүй. Шийдэгдсэн, урагшилсан зүйл алга. Ганц л зүйлийг ерөнхийлөгч хийж чадлаа. Тэр Бөхийн холбооны өмч болох Бөхийн өргөөнөөс удирдлагуудыг нь гаргаж, цагдаагийн хяналтан дор Бөхийн өргөөг битүүмжилж авлаа.
Бусад талаар ахиц гарсангүй. Одоо бөхийн өргөө рүү орох гарах, тэнд төлөвлөгдсөн тэмцээн, уралдаан, тоглолтыг бүгдийг цуцалсан. Сахил хүртээд шал дордов гэгч болжээ. Хэрүүл маргаан нь даамжран гүнзгийрсээр, дээр нь бөхчүүд барилдах өөрийн өргөө гэргүй болж хохиров. Дэндүү эмгэнэлтэй биш үү. Бөхчүүдийн каленьдарчилсан барилдаан тасрахад хүрч, аргаа барахдаа Спортын ордны жижигхэн заалыг зорих болов. Зориулалтын бус талбайд барилдах нь бөхчүүдийн ч, үзэгчид, бөхийн хорхойтнуудын эрх ашгийг хохироож байна. Наадмын сорилго барилдаанаа ч Бөхийн өргөөндөө явуулж чадахгүйд хүрчээ. Наадам хаяанд иржээ, гэтэл. Асуудлыг шийдэж чадахгүй, зөнд хаях байсан юм бол хушуу дүрэх шаардлага байсан юм бол уу? гэж асуух үлдлээ.
Ц.ЭНХБАТ