7 тэрбум төгрөгөөр зэрэгцээ зам барих гэж буй тухай Завхан аймгийн сэтгүүлчид өнөөдөр мэдээллээ. Тодруулбал Завхан аймгийн Тосонцэнгэл сумаас Увс аймгийн Улаангом сумын чиглэлийн 167км замын ажил саяхан эхэлсэн байна. Уг зам Тосонцэнгэл сумын дөрвөн замын уулзвар гэдэг газраас эхлэн баригдах бөгөөд зургийн дагуу эндээс явбал саяхан баригдаж дууссан Улиастайн шинэ замтай 25 км газар зэрэгцэж баригдахаар байгаа аж. Ийнхүү зэрэгцэн давхих замд 7-10 тэрбум төгрөгийг илүү зарж байгааг тэд мэргэжлийн хүмүүстэй хамтран эдийн засгийн тооцоо гаргажээ. Тиймээс Улаангомын замын эхлэлийг 4 замын уулзвараас биш 15 км-ийн цаанаас буюу Улиастайн замаас эхлүүлбэл 10 км зам хэмнэхээр байгааг хэллээ. Завхан аймгийн сэтгүүлч М.Амарбаяр энэ талаар “Энэ замыг татвар төлөгчдийн мөнгөөр барьж байгаа. Тиймээс бид замын мэргэжилтнүүдтэй хамтран ийм тооцоо гаргасан. Замын зургийг өөрчиллөө гээд замын зай, байршилд ямар ч өөрчлөлт гарахгүй бөгөөд зөвхөн мөнгө л хэмнэж байгаа юм” гэлээ.
Уг замыг БНХАУ-ын хөрөнгө оруулалттай “Монгол ЛЗ зам гүүр” компани уг замыг 660 сая юань буюу 250 тэрбум 800 сая орчим төгрөгийн өртгөөр 2 жилийн дотор барихаар 2015 онд концессийн гэрээ хийжээ. Улаангомын зам ашиглалтад орсноор Завхан аймгийн хойд талын сумд, Увс аймаг УБ-хоттой хатуу хучилттай замаар холбогдох юм. Шинээр баригдах 167км зам нь Завханы Нөмрөг, Түдэвтэй, Сонгино сумдыг дайран өнгөрөхөөр тооцоо гарчээ.
Тэд энэ асуудлаа эхний ээлжинд Зам тээврийн сайд Бат-Эрдэнэд энэ саналаа хүргүүлж, цаашлаад Сангийн сайд, Ерөнхий сайдад хандана гэдгээ илэрхийллээ. Ийнхүү 7 тэрбум төгрөгийг хэмнэх эсэх нь сайдын мэдэлд үлдлээ.
О.НАНСАЛМАА