Жудагтай, дэг жаягтай байхыг үлгэрлэх учиртай улсын том цолтой Монгол бөхчүүдийн ёс зүйгүй авир дэнджээ. Тэд хүндлэл даахаа больжээ. Бөхийн өргөөг тойрсон хэрүүл маргааныг орхиё. Бөхийн ёс жудгаа алдсан тод томруун жишээг Дундговь аймгаас төрсөн хамгийн өндөр цолтой бөх Л.Пүрэвжав харцага энэ наадмын өдрүүдэд үзүүлсэн байна.
Тэр архи ууж, хутга мэс гарган залуу бөхийг ална тална гэж танхайрсан тухай "Ард түмний хяналт"-д иргэд хандлаа. Дундговийн наадмын өмнөх 7-р сарын 9-ний өдөр тэрээр ийнхүү танхайран аймгийн начин цолтой залуу бөхийг архиар шахсан байна.
Учир юу болсныг тодруулбал: Маргааш нь барилдахаар бэлтгэлээ базаасан бөхчүүд дээр ирсэн харцага Л.Пүрэвжав аймгийн начин О-г архиар шахахад залуу бөх: "-Маргааш наадамд зодоглоно. Архи уухгүй" хэмээн татгалзжээ. Харцага өөрийгөө хүндэлсэнгүй гэж үзэн аягатай архийг нүүр лүү нь цацаж, улмаар түрийнээсээ хутга гаргаж ирэн давшилсан ажээ.
Харин азаар Улсын начин Б.Чинзориг овсгоо самбаа гарган тогтоож барьж аваагүй бол хүн амины хэрэг гарах байсан тухай эх сурвалж бидэнд мэдээллээ. Б.Чинзориг начин: "Пүрэвжав аа, чи юу хийж байнаа аа?" хэмээн түүнийг өрөөнөөс түрэн гаргаж, Дундговь аймгийн Цагдаагийн хэлтэст дуудлага өгснөөр цагдаагийн бие бүрэлдэхүүн харцагыг авч одсон байна. Энэ бүхнийг тус буудлын өрөөнд тухайн мөчид хамтдаа байсан бөхчүүд гэрчилнэ гэж нутгийн иргэн утсаар мэдээллээ.
Хачирхалтай нь асуудал үүгээр дууссангүй. Тун удалгүй Л.Пүрэвжав харцага буудлаар дахин эргэлдэж, хутга шөвөг гарган, нөгөө залуу бөхийг эрж хайжээ. Хутга барин танхайрах халамцуу хүнийг яагаад суллаж байгаа юм бэ? гэсэн асуултанд, "- Б.Чинзориг начин явуулчих гэсэн юм". - Хутгыг нь хураасан уу? гэвэл " - Хутга гэх юм байгаагүй. Хумсны хутганы төдий юм машинд нь байсан" гэж цагдаагийн ажилтан хариулсан аж. Буудлынхан аргаа барж, Цагдаагийн хэлтсийн даргад дахин хандаж байж, танхай Л.Пүрэвжав харцагыг саатуулуулжээ.
Ц.ХИШГЭЭ
