Монголд тогтмол хэвлэгдэж байгаа өдөр тутмын 6, 7 сонин, өргөн нэвтрүүлгийн 10-аад телевиз, дэлхий даяар цацагдаж байгаа төдий тооны мэдээллийн сайтууд уншигч, үзэгчдэдээ хүрч байна. Эдгээр хэвлэлүүд бүгд дөрөв дэх засаглалын үүрэг гүйцэтгэж, ард түмний нүд чих болдог, мэргэжлийн редакцитай, мэргэжлийн ёс зүйн хүрээнд ажилладаг. Зүй нь, төрийн гурван өндөрлөг эдгээр төвийн хэвлэл мэдээллийн хэрэгслээр гарч, төрийн бодлого, хандлага, байр суурийг ард түмэндээ нээлттэй хүргэж байх ёстой юм. Мэргэжлийн редакцийн асуулттай ярилцлагад орж байх нь төр, ард түмний хоорондох эрүүл харилцааг бүрдүүлж байх учиртай. Дан ялангуяа ардчилсан орны төрийн гурав шүү дээ. Гэтэл сүүлийн хэдэн жилд Ерөнхийлөгч, УИХ-ын дарга, Ерөнхий сайд гурвын төвийн хэвлэл мэдээлэлд өгсөн ярилцлага үзэгдэхээ ч больчихлоо. Төрийн өндөрлөгүүд нь чөлөөт хэвлэлд яагаад ийм хаалттай байдаг болчихов оо. Юунаас тэгтлээ нуугддаг болчихов. Хэтийдсэн их улстөрөөсөө болоод ам нээж ч чадахаа байхчихав уу гэлтэй. Эргээд сөхөөд харъя гэхэд харах юм үлдэхгүй нь.
Удахгүй намрын их ажлууд ар араасаа ундарч, улс орны нийгмийн амьдрал газар сайгүй бужигнана. Тариа хураалт, өвөлжилтийн бэлтгэл, хүүхдүүдийн сургууль соёл гээд энэ улсын айл бүхэнд мундахгүй их ажил өрнөнө. Намрын чуулган эхэлнэ. Чуулганаар Монголын эрх ашигт нэн хамаатай хэд хэдэн чухал асуудлуудыг хэлэлцэхээр байна. Манай төсвийг бүрдүүлдэг гол түүхий эд болох зэсийн ханш дэлхийн зах зээл дээр унаж байна, бензин шатахууны үнэ нэмэгдчихлээ. Үер ч боллоо. Ер нь жирийн ард түмний амьдрал шар үс нь унаагүй эцэж турсан мал шиг болтлоо дорой явна. Яг энэ үеэр төрийн гурван өндөрлөг хэвлэл мэдээллийн хэрэгслээр ярилцлага өгч, ард түмэндээ Монгол төрийн бодлого, хийж хэрэгжүүлж байгаа ажлуудаа тайлагнаж, хоёргүй үгээр яримаар байна.
Ер нь Монголын хөгжлийн төлөв цаашдын 5, 10 жилдээ ямар байх юм бэ, Ерөнхийлөгч юу гэж харж байгаа юм, Ерөнхий сайд ямар ажил гүйцэтгээд яваа юм, УИХ-ын дарга юу бодож суугаа юм, энэ бүхнээ нэг ярьж хэлэх цаг тулаад байна. Монголыг өөд нь татах Таван толгой босож чадах уу, өөр хэрэгжүүлэх том төсөл хөтөлбөр бий юу, яаж хэрэгжүүлэх вэ, ажлын байр бий болгож байгаа юу, өр зээлээ хэрхэн төлөх вэ, гадаад дотоод айлчлал хийх үү, манай гадаад харилцаа хаашаа яаж тэлж байгаа вэ гээд олон асуултад төрийн гурван өндөрлөгийн байр суурь тодорхой харагдах зайлшгүй хэрэгтэй байна.
Хэний бүлэглэл хүчтэй вэ гэж үзэлцэхээ түр ч болтугай азнаж, төрийн хамгийн дээд албыг хашиж яваагаа нэг санах цаг ирсэн бус уу. Хов хөөцөлдөж, хэнийг халах уу, солих уу гэж энгэр заамаа уралцаж байх зуурт чинь ард түмний амьдрал зогсоолдоо зогсчих шахаад байна шүү дээ. Хэтэрхий их улс төр чинь улсаа хөмөрчих шахаад байгааг сэхээрч харвал ямар вэ.
Ц.БАЯРЖАРГАЛ
.
