Монголын брэнд болох “Guyug” брэндийг “хятадад үйлдвэрлэдэг, монгол брэнд гэж худлаа” гэх мэдээлэл олон нийтийн сүлжээнд цацагдаад байгаа билээ. Тэгвэл тус компанийн зүгээс албан ёсны тайлбарыг өглөө.
2018 оны Наадмаас хойш GUYUG брендийн бүтээгдэхүүнүүдийг дуурайлган, зохиогчийн эрхэд халдан, хуурамчаар Хятадад үйлдвэрлэж Өвөр Монголын зах зээлд их хэмжээгээр бөөнөөр худалдаалж байгаа хэргүүд удаа дараа гарч байгаа тул бид энэ асуудалд нухацтай хандаж хууль хяналтын байгууллагад мэдэгдэж шийдвэрлэхээр ажиллаж байгаа талаараа албан ёсны пэйж дээрээ нийтэлжээ.
Яг ийм зохиогчийн эрхэд халдсан, эх хувийг хуулбарласан тохиолдол монголд ч гарсан байна. Тухайлбал тус компанийн зураач Ундармаагийн зурсан бүтээлийг ээмэг бөгжин дээр зурж Шөнийн захад худалдаалж байсан байна. Хуулбарласан эзнийг олж, асуудлыг шийдвэрлэсэн талаар компанийнхан хэлсэн юм.
3 дахь жилдээ үйл ажиллагаа явуулж байгаа тус брэндийн үйлдвэр нь хорооллын эцэст байрладаг ба 1000м2 талбайтай байранд байрладаг байна.
Б.ХУЛАН
