МЗЭ-ийн шагналт, яруу найрагч Хулганайн Тэргэл Интер номыг хөлд даруулав. Тэрбээр АНУ-ын Чикаго хотод амьдардаг бөгөөд хэдхэн хоногийн өмнө эх орондоо ирээд байгаа аж. Эх орондоо ирсэн гол зорилгоо ийнхүү биелүүлж “Эргэж бүү хар” номынхоо нээлтийг хайртай гэр бүл, эрдэмтэн багш, уран бүтээлч анд найз нөхөд, нүүр номын уншигчидтайгаа хамт “Интерном”-ын их дэлгүүрт хийлээ.
Зохиолч Х.Тэргэл энэхүү номоо “Эргэж бүү хар” хэмээн нэрлэсэн тухайгаа тайлбарлахдаа “Хүн бүрийн нийтлэг араншин байх юм аа. Бүгд л өнгөрснөө дурсдаг, харамсдаг. Гэхдээ харамсалтай нь юу ч өөрчлөгдөхгүй шүү дээ. Тэр цаг хугацаа эргэж ирэхгүй. Тиймээс л маргааш, нөгөөдрийг үзэж харж яваадаа илүү талархаж явах хэрэгтэй. Иймээс “Эргэж бүү хар, бүү харамс, өнөөдөр, маргааш, нөгөөдөрт илүү тэмүүлж амьдар” гэсэндээ ингэж нэрлэсэн” гэлээ.
Уран бүтээлчийн хувьд хурц, гал цогтой түүний сэтгэлгээний цараа хаа хүрч таны амьдралыг өнгөлөх, ухааруулах юуг алган дээр тань тавьсныг уншигч та эргэцүүлэн нэг бодож, “Эргэж бүү хар” номоор тархиа цэнэглэн, тунгаан уншаарай.
Ц.ТЭГШБУЯН