“Далан давхар”-ын оршуулгуудыг нүүлгэн шилжүүлж, тус газарт бүтээн байгуулалт хийхээр нийслэлээс төлөвлөөд удаж байна. Засгийн газрын 88 дугаар тогтоолын дагуу Нийслэлийн агаарын бохирдолыг бууруулах, 21.392 айл өрхийг 4КВт-ын цахилгаан халаагуур хэрэглэх, техникийн боломж бүрдүүлэх ажлын хүрээнд хэрэгжүүлж буй чадал бүхий "Хүчит шонхор" дэд станцыг барих юм. (Тус дэд станц нь 110/10 кВ-ын 2х40 мВА-ын хүчин чадалтай )
Тэгвэл барилга угсралтын ажил эхлэхээр зэхэж буй учир нүүлгэн шилжүүлэх ажлыг өчигдрөөс эхлүүлжээ. Барилгын ажилтай холбоотой нүүлгэн шилжүүлэх шаардлагатай байгаа шарилуудын ар гэрийнхэнтэй нь холбогдож, уулзсан гэдгээ албаныхан хэллээ. Зөвхөн станц барих газар дээрх шарилуудыг мэргэжлийн байгууллагууд чандарлахаар болжээ. Тус газарт ойролцоогоор 42 мянга гаруй шарил байдаг ч зарим нэг нь эвдэрч тоногдсон, хөшөө чулуу нь нэр хаяггүй болж, ар гэр нь эргэж очихоо больсон байна.
Тиймээс шарилуудын ар гэрийнхэнтэй нь холбогдож учир байдлыг хэлэхэд эерэгээр хүлээж авсан тухай хэллээ. Тэд 400 орчим иргэдтэй уулзаж, зарим шарилыг таниулах ажил хүртэл хийж албан ёсны зөвшөөрөл авснаа хэлсэн юм.
.JPG)
Б.ХУЛАН
