ЦАХИМ ОРЧИНД “ЭЕРЭГ” БАЙХЫГ УРИАЛЛАА

2018-09-24  

Өнөөгийн нийгэмд өсвөр үе, залуучууд цахим сүлжээнд оролцолгүйгээр өдөр тутмын амьдралаа төсөөлөхөд бэрх болсон. Тухайлбал Монгол Улс “Фэйсбүүк” хэрэглэгчийн тоогоор дэлхийн дунджаас 2,1 дахин, Ази тивийн улс орнуудын дунджаас 3,6 дахин их байгаа талаар Харилцаа холбооны зохицуулах хорооноос, цахим мэдээллийн аюулгүй байдлын эсрэг гэмт хэрэг болон интернэт орчинд үйлдэгдэж байгаа бусад төрлийн гэмт хэрэг 2017 онд 299 байсан бол 2018 оны эхний хагас жилийн байдлаар 279 бүртгэгдэж, өнгөрсөн оны мөн үеэс 5 дахин өссөн үзүүлэлттэй байгаа талаар ЦЕГ-ын Урьдчилан сэргийлэх хэлтсээс тус тус мэдээлсэн. Тиймээс Нийслэлийн Залуучуудын хөгжлийн газраас санаачлан “Эерэг, аюулгүй, хариуцлагатай цахим орчин” сэдэвт хэлэлцүүлгийг нийслэлийн Иргэний танхимд зохион байгууллаа.

Тус хэлэлцүүлэгт оролцсон нийт 300 орчим залууст залуучуудад цахим орчинд эерэг мэдээлэл түгээж, зөв хандлагатай, хариуцлагатай оролцох, гэмт хэргээс урьдчилан сэргийлэх талаар холбогдох албаны хүмүүс мэдээлэл өгчээ.  Нийслэлийн есөн дүүргийн залуучуудын төлөөлөл, ЕБС-ийн ахлах ангийн сурагчид, их, дээд сургуулиудын оюутнууд тус хэлэлцүүлэгт хамрагдсан байна.

Мэдээллийн технологийн хөгжил олон давуу талыг бий болгож байгаа хэдий ч багагүй сөрөг талуудыг дагуулж байгаа юм. Иймд цахим хэрэглээний соёлыг төлөвшүүлэх, аюулгүй байдлыг хангах шаардлага бидний өмнө тулгарч байгаа билээ. Тиймээс эерэг, аюулгүй, хариуцлагатай цахим орчин бүрдүүлэхэд залуучуудын идэвх, санаачилга, оролцоог нэмэгдүүлэх нь чухал байгааг албаныхан хэллээ.  Улс орны хөгжлийн тулгуур болох өсвөр үе, залуучууд цахим орчинд ихэнх цагаа зарцуулж, бүх төрлийн мэдээ, мэдээллийг ямар ч шүүлтүүргүйгээр хүлээн авснаар цахим гэмт хэрэгт өртөх, эх сурвалж нь баталгаагүй мэдээлэлд төөрөлдөх зэрэг сөрөг үр дагаварууд гарсаар байгаа юм.  

Хэлэлцүүлэгт оролцсон гурван зуун залуучууд эерэг цахим орчин бүрдүүлэх элч болсон бөгөөд өнөөдрөөс эхлэн “Эерэг, аюулгүй, хариуцлагатай цахим орчин- Залуучуудын оролцоо” сэдэвт аян өрнүүлж, 7 хоногийн турш цахим орчинд соёлтой, хариуцлагатай оролцохыг уриалсан эерэг мэдээлэл түгээх юм.

Тухайлбал Даваа гараг “Эерэг мэдээллийн өдөр”, Мягмар гараг “Талархах өдөр”. Ням гараг “Хамгааллын өдөр” буюу энэ өдөр өсвөр насныхны цахим орчны хэрэглээнд анхаарал хандуулж, цахим халдлагаас урьдчилан сэргийлэх аргуудын талаар хүүхдэдээ, дүүдээ, гэр бүлийнхэндээ, найздаа зааж өгөх өдөр юм аж. Уг аянд урлаг соёлын одууд нэгдсэнийг энд дарж харна уу. 

Аяны талаар хэлэлцүүлэгт оролцогч, МУБИС-ийн сэтгүүлчийн ангийн 3-р дамжааны оюутан Б.Должинжав:

-Залуус бид нэн тэргүүнд цахим орчинд бусдын нэр төрд халдахгүйгээр мэдээлэл солилцох, хамтрах зэрэг эерэг боломжийг эрэлхийлэх хэрэгтэй. Мөн цахим орчинд аюулгүй зөв сонголтуудыг хийх, эерэг контентуудыг бүтээж, түгээж бусдад үлгэр жишээ үзүүлэх ёстой. Залуучуудаа цахим орчинд эерэг, хариуцлагатай оролцоог дэмжиж, өдөр бүрийг эерэг мэдээллээр эхлүүлж байхыг уриалъя” гэсэн юм.

Тус хэлэлцүүлэгт ЦЕГ-ын Урьдчилан сэргийлэх хэлтсийн ахлах мэргэжилтэн, цагдаагийн хошууч Д.Болор, Засгийн газрын хэрэгжүүлэгч агентлаг Харилцаа холбооны зохицуулах хорооны Захиргаа, удирдлагын хэлтсийн дарга А.Эрдэнэбулаг, МУБИС-ийн Нийгэм, Хүмүүнлэгийн ухааны сургуулийн захирал,  Доктор, Профессор Ж. Батбаатар, “Хэвлэлийн Хүрээлэн” ТББ-ын  Гүйцэтгэх захирал, Доктор М.Мөнхмандах, “Хэвлэл Мэдээллийн Зөвлөл” ТББ-ын гүйцэтгэх захирал Г.Гүнжидмаа, “Эко” телевизийн редактор Ц.Цогцэцэг, “Хүннү.мн” цахим мэдээллийн сайтын гүйцэтгэх захирал Ц.Соёлмаа, МУБИС-ийн 3-р дамжааны оюутан Б.Должинжав нар оролцож, цахим орчин ба өнөөгийн нөхцөл байдал, цахим гэмт хэргээс урьдчилан сэргийлэх нь, эерэг, аюулгүй цахим орчныг бүрдүүлэхэд залуучуудын оролцоо зэрэг сэдвээр мэдээлэл өгч, хэлэлцүүлэг өрнүүлжээ. 

 

Б.ХУЛАН 

Мэдээ уншаад таалагдсан бол Like дарна уу. Танд баярлалаа
Сайт таалагдаж байвал Like дарна уу. Танд баярлалаа
Сэтгэгдэл
АНХААРУУЛГА : Уншигчдын бичсэн сэтгэгдэлд CONTROL.MN хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдлийг админ устгах эрхтэй. Сэтгэгдэлтэй холбоотой санал гомдлыг 77008912 утсаар хүлээн авна
Төстэй мэдээ
Шинэ мэдээ
Санал асуулга
"ТҮМНИЙ-76"-Г ОЛОН НИЙТИЙН САНАЛ АСУУЛГААР ТОДРУУЛАХ НЬ ЗӨВ ҮҮ ?