Нийслэлийн өмчийн харилцааны газраас зуслангийн газар өмчлөлийн ажлыг энэ сарын 8-аас эхлэн байгуулах болсноо мэдэгдлээ. Тус газрын хэвлэл олон нийттэй харилцах хэлтсийн ажилтан Л.Баянбатын хэлснээр Сүхбаатар болон Чингэлтэй дүүргийн 26 байршилд зуслангийн зориулалтаар газар өмчлүүлэхээр шийдвэрлэжээ.
Уг хоёр дүүрэгт судалгаа хийж, 18 мянга 216 нэгж талбарт газар өмчлүүлэх боломжтой гэсэн дүгнэлт гаргасан байна. Иргэд газар өмчилж авах хүсэлтээ www.land.ulaanbaatar.m цахим хуудас болон дүүргүүдийн Өмчийн харилцааны газраар дамжуулан өгөх ёстой аж. Эхний ээлжинд Сүхбаатар, Чингэлтэй дүүргийн зуслангийн газрыг өмчилсний дараа Сонгинохайрхан, Баянзүрх дүүргүүдийн газрыг хэсэгчлэн төлөвлөснөөр өмчлөх юм байна. Сүхбаатар дүүрэгт Ар хустай, Цолмон, Цээнэ зэрэг 14 байршилд газар өмчлөхөөр боллоо. Мөн Чингэлтэй дүүрэгт Жигжид, Яргайт, Ар согоот гэсэн долоон газрын байршлыг өмчлөх жагсаалтад оруулаад байна.
Х. АЯЛГУУ