Хэвлэлийн Хүрээлэнгээс ХБНГУ-ын Дойче Велле Академитэй хамтран Эрэн сурвалжлах сэтгүүл зүйн шилдэг бүтээлийн уралдааныг хоёр дахь жилдээ зохион байгууллаа. Тэгвэл өчигдөр орой энэ жилийн шилдгээ тодруулж шагналыг гардуулсан юм.
“Цахиур 2018” эрэн сурвалжлах бүтээлийн гранпри шагналыг Өнөөдөр сонины сэтгүүлч Х.Уянга “Хувьсан өөрчлөгдсөөр буй “үнэн” буюу цианидын хэргийн буруутан хэн бэ” гэх найман цуврал сурвалжилгаараа хүртлээ. Тэрээр энэхүү бүтээлээрээ “Балдорж 2018” шагналын шилдэг 10 сэтгүүлчийн тэргүүн эгнээнд зогссон билээ.
Гран При шагналт сэтгүүлч Х.Уянга “Ийм том шагнал авна гэж мэдээгүй ажил дээрээ сууж байлаа. Цианидын асуудлыг би энэ оны гуравдугаар сараас эхлээд наймдугаар сар хүртэл бүтэн таван сарын турш сурвалжилж, найман цуврал сурвалжилга гаргасан. Энэ хүч хөдөлмөрийг минь урамшуулж, дэмжсэн Хэвлэлийн хүрээлэнгийн хамт олондоо баярлалаа” гэсэн юм.
Харин дэд байрт Ховд аймгийн сэтгүүлч С.Жавзандулам “Цаанаа учиртай цагаан эрэг” цуврал нэвтрүүлгээрээ хүртсэн юм.
Монголын эрэн сурвалжлах сэтгүүл зүйн хөгжилд хувь нэмэр оруулах, эрэн сурвалжлах сэтгүүлчдийг зоригжуулан урамшуулах гол зорилготой энэхүү уралдаанд Ийгл тв, МҮОНРТ тэргүүтэй 18 ХМ-ийн байгууллагын 22 бүтээл өрсөлджээ. Та бүхэн Цахиур 2018 уралдааны гран при бүтээлийг Энд дарж уншина уу.
Сэтгүүлч, сэтгүүл зүйн багш, хэвлэл мэдээллийн мэргэжилтнээс бүрдсэн шүүгчдийн баг бүтээлүүдийг шүүж, шалгаруулсан байна. Ингэхдээ бүтээлд хөндсөн асуудлын ач холбогдол, үр нөлөө, мэргэжлийн хэм хэмжээ, тухайн сэдэв, асуудлыг эрэн сурвалжлахад зориулсан хүч хөдөлмөр, зоригт гол үнэлэлт өгсөн байна.
О.НАНСАЛМАА
