Олон улсын эрүүгийн цагдаагийн байгууллага буюу Интерполын дарга Мэнь Хуньвэй сураггүй алга болсонтой холбогдуулан Францын тал мөрдөн шалгах ажиллагаа эхлүүлжээ.
“М.Хуньвэй Францад алга болоогүй” гэж түүний ойрын эх сурвалж “AFP” агентлагт мэдээлжээ. Харин “The South China Morning Post” сонин баасан гарагт 64 настай М.Хуньвэйг байцааж байгаа тухай мэдээлсэн байна. “Түүнийг мөрдөн шалгах болсон шалтгаан болон түүний хаана байгаа нь тодорхойгүй байна” гэж уг мэдээлэлд нэмж тэмдэглэжээ. Холбогдох албаны хүмүүсийн мэдээлснээр, М.Хуньвэй өнгөрсөн есдүгээр сарын 29-нд Францын Лион хот дахь Интерполын төв байрыг орхин БНХАУ руу явснаасаа хойш гэр бүлийнхэнтэйгээ холбоо бариагүй аж.
Коммунист намын өндөр албан тушаалтан М.Хуньвэйн талаар одоог хүртэл ямар нэг мэдэгдэл БНХАУ-ын холбогдох албанаас хийгээгүй байгаа юм.
Б.ХУЛАН
