Азийн 48 орны 440 гаруй сэтгүүлч Сөүл хотноо чуулж, бүс нутгийн шилдэг туршлагаас хуваалцаж, цахим аюулгүй байдлыг хангах, хуурамч мэдээллийг нятглан шалгах, дата сэтгүүл зүйн арга техник, мөрдлөг хавчлагаас хэрхэн зайлсхийх зэрэг Эрэн сурвалжлах сэтгүүлчдийн амин чухал асуудлуудыг хэлэлцлээ.
Гурван өдөр үргэлжилсэн энэхүү хурлын үеэр 60 гаруй хэлэлцүүлэг явагдаж, Ази, Номхон далайн бүс нутгийн 126 сэтгүүлч, шинжээчид үг хэлж, туршлагаа хуваалцлаа. Чуулганд оролцогчид мэргэжлийн үүргээ гүйцэтгэсний төлөө Мьянмарьт хоригдож буй Ройтерс агентлагийн сэтгүүлч Ва Лон болон Кья Со О нарыг нэн даруй чөлөөлөхийг шаардаж, дараах мэдэгдлийг гаргав.
Сэтгүүл зүй бол гэмт хэрэг биш Дэлхийн өнцөг булан бүрт эрэн сурвалжлах сэтгүүлч, тэдний хамтран зүтгэгчдийн эсрэг дарамт, хүчирхийлэл, халдлага, мөрдлөг сэтгэл түгшээх хэмжээнд ихэсч буй; Тийнхүү хүчирхийллийн арга хэрэглэж буй албан тушаалтнууд ял зэмгүй өнгөрч буй; Авлига, зохион байгуулалттай гэм хэргийг илчлэх, эрх мэдлээ урвуулан ашиглаж буйг ил болгох, хариуцлага шаардах, иргэний нийгмийг бэхжүүлж, ардчиллыг дэмжихэд эрэн сурвалжлах сэтгүүл зүйн онцгой ач холбогдлыг онцлон тэмдэглэж, Азийн Эрэн сурвалжлах сэтгүүл зүйн гуравдугаар чуулганд оролцож буй дэлхийн дөч гаруй оны төлөөлөгч хэвлэлийн эрх чөлөөг хамгаалах, эрх чөлөөгөө алдагсдыг суллах, сэтгүүлчдийг хүчирхийлэгсэд ял зэмгүй өнгөрч буй зогсоохыг орон орны засгийн газар, олон талт хамтын ажиллагааны байгууллага, албан тушаалтнуудаас шаардаж байна.
Түүнчлэн олон нийтийн эрх ашигт үйлчилж, онцгой чухал асуудлыг сурвалжилсныг нь “гэмт хэрэг” хэмээн үзэж, шударга бусаар яллаж хорьсон Ва Лон болон Кья Со О нарыг нэн даруй чөлөөлөхийг Ан Сан Су Ки, Мьянмар улсын засгийн газраас шаардаж байна. Энэхүү хуралд Монгол улсаас Эрэн сурвалжлах сэтгүүл зүйн олон улсын сүлжээний гишүүн байгууллага Хэвлэлийн Хүрээлэнгийн төлөөлөл оролцсон юм.
С.ЧИМГЭЭ
