Олон улсад салбартай "Сакура" бүрэн дунд сургууль монголд албан ёсоор нээгдлээ. Монгол хүүхдүүдийг Америк хөтөлбөрөөр Япон хүмүүжлээр сургах гол зорилготой тус сургуульд УИХ-ын гишүүн асан, Кёкүшюзан Д.Батбаяр 22 тэрбум төгрөгийн хөрөнгө оруулалт хийсэн байна.
Тэрээр тус сургуулийн онцлогийн тухайд “Хүүхдүүд 10 жилдээ сурч сурчихаад төгсөөд ахиад л хэлний сургалтууд хэсээд байна. Үүнийг нэгтгэж, англи япон хэлийг маш сайн сургах хэрэгтэй. Энэ сургуулийг төгссөн хүүхэд ахиж сургалтад суухгүй л байх хэмжээний чадварлаг хүүхдүүд болно. Боловсролын систем дэх хуучинсаг үзлийг халж байгаагаараа онцлог. Тухайлбал хүүхдүүд ангидаа мөлхөөд ч явж болдог тусгай шал хүртэл бэлдчихсэн. Заавал номхон сууж хичээл хийх шаардлагагүй, сонирхлоороо нээлттэй байх боломжийг япон стандартын дагуу нэвтрүүлж байна гэсэн үг. Энэ нь хүүхдийг тал талын авьяасаа нээхэд маш чухал үүрэгтэй юм билээ” гэсэн юм.
Сургуулийн нээлтэд УИХ-ын зарим гишүүд болон Т.Баясгалангийн дууг чадварлагаар дуулдаг гэгддэг дуучин Э.Чулуунчимэг болон түүний хуучин нөхөр Б.Болд нар хүрэлцэн ирсэн байв. Хүүхдийг багаас нь сонирхлоор нь хөгжүүлнэ гэдэг ирээдүйд нь маш том суурь болдог. Тиймээс энэ сургуульд хүүхдийн сонирхлыг хөгжүүлэх, дэмжих бүх төрлийн дугуйлан секцүүд хичээллэж байгаа юм байна. Тус сургуулийн төлөөлөн удирдах зөвлөлийн даргаар дуучин Т.Баясгалан ажиллах аж.
О.НАНСАЛМАА