ХХААХҮ-ийн сайд Б.Батзориг жижиг, дунд үйлдвэрийг хөгжүүлэх сангаас олгох хөнгөлөлттэй зээлийг хүссэн төслийг 2018 оны дөрөвдүгээр сарын 3-16-ны өдрүүдэд хүлээн авчээ. Ингээд Төсөл сонгон шалгаруулах хорооны хурлаар хэлэлцээд одоогийн байдлаар 140 компани, хувь хүнд зээл олгохоор шийдэж, санхүүжилтийг шийдвэрлээд явж байгаа юм байна.
Сүүлийн өдрүүдэд Б.Батзориг сайдыг эхнэрийнхээ компанид ЖДҮ-ийг хөгжүүлэх сангаас их хэмжээний зээл олгосон хэмээн цахим орчинд цуураад байгаа юм. Түүгээр ч барахгүй зарим хэвлэл мэдээллийн хэрэгслээр баримттай нийтлэл хүртэл гарсан билээ. Тэгвэл энэ бүхэнд сайд хариу хэллээ. Тэрээр “Надад хөдөө аж ахуйн чиглэлээр үйл ажиллагаа явуулдаг нэг ч компани байхгүй. Ийм гүтгэлгийн шинжтэй зүйл удаа дараа яваад байвал би зөрчлийн хуулийн дагуу хууль хяналтын байгууллагад хандана” гэв.
Б.ХУЛАН