Азийн хөлбөмбөгийн холбооноос зохион байгуулдаг 19-өөс доош насны эмэгтэйчүүдийн АШТ-ний сонгон шалгаруулах тэмцээний хэсгийн эхний тоглолтууд явагдлаа. Тус тэмцфээнд оролцож буй Монголын шигшээ баг Австралийн багт 18:0-ээр хожигдож гараагаа тааруу эхлүүллээ.
Тоглолт эхлээд ердөө эхний 20 минутад Монголын шигшээ баг хаалгандаа гурван гоол алдав. Тоглолтын зургаа дахь минутад Австралийн шигшээгээс Принцесс Ибини-Исей гоол оруулсан бол 11 дэх минутад дахин гоол оруулсан юм. Харин 19 дэх минутад Монголын шигшээ багийн Г.Тэмүүлэн өөрийнхөө хаалганд гоолдсоноор 3:0 болжээ. Энэ удаагийн тоглолтод Австралийн шигшээ багаас Ибини-Исей таван гоол, Кира Күүни-Кросс дөрвөн гоол, Аойфе Колуилл хоёр гоол оруулж багаа ялалтад хөтөлсөн юм.
Монголын шигшээ баг өнөөдөр Хонконгийн шигшээтэй учраа таарсан бол Австралийн шигшээ Ливаны шигшээ багтай учраа таарчээ.
Д.НЯМАА