Пүрэв гарагт Марокко улсын тэнгисийн цэргийн хүчин Газрын дундад тэнгисийн эрэг орчмоос Африкийн 59 цагаач иргэний амийг аварсан байна. Марокко улсын нутаг дэвсгэрт хамаарах хэсгээр эргүүл хийж явсан тэнгисийн цэргийн хүчний хамгаалалтын ажилтнууд живж байсан цагаачдын завинд тусламж үзүүлсэн бөгөөд уг завь нь Надор хотыг зорин явж байсан ажээ. Цагаач иргэдийн дунд таван эмэгтэй байсан бөгөөд цагаач иргэдийг Надор боомт хотод аюулгүй хүргэж өгсөн байна. “Аврах ажиллагаа дууссаны дараахан завь живсэн” гэж эх сурвалжууд мэдээлжээ. Сүүлийн хэдэн сарын хугацаанд Марокко улсын нутаг дэвсгэрээр дамжих хууль бус цагаач иргэдийн тоо ихээхэн нэмэгдэх болсон байна. Тус улсын засгийн газрын мэдээлснээр, энэ оны эхний найман сарын байдлаар хууль бус цагаачдыг тээвэрлэсэн 54 мянган тохиолдол бүртгэгдсэн ба үүнийг өнгөрсөн оны мөн үетэй харьцуулахад 15 мянгаар өссөн аж.
