Өрхийн үйлдвэрлэл, бичил бизнесийнхэнд олгодог Жижиг дунд үйлдвэрлэлийг дэмжих сангийн 3 хувийн хүүтэй зээлд УИХ-ын нэр бүхий гишүүд хамрагдсан нь дуулиан тариад байна. Энэхүү гэмт үйлдлийг АТГ-аас шалгаж өнгөрсөн пүрэв гарагийн шөнө ХХААХҮЯ-ны Төрийн нарийн бичгийн дарга болон ЖДҮДС-гийн захирал, ерөнхий санхүүч, бичиг хэргийн ажилтныг баривчилсан. Тэгвэл өнөөдөр Улсын ерөнхий прокурор М.Энх-Амгалан УИХ-ын гишүүн, Хүнс, хөдөө аж ахуй, хөнгөн үйлдвэрийн сайд Б.Батзоригийг парламентын гишүүнийх нь бүрэн эрхийг түдгэлзүүлэх тухай албан бичгийг УИХ-ын дарга М.Энхболдод өгчээ.
Шинээр баталсан УИХ-ын тухай хуулийн зургадугаар зүйлийн 6.9.2-т, “Гишүүнд холбогдуулан эрүүгийн хэрэг үүсгэсэн бөгөөд УЕП түүний бүрэн эрхийг түдгэлзүүлэх тухай саналыг УИХ-д оруулсан бол УИХ хэлэлцэн шийдвэрлэнэ” гэсэн заалт бий. Мөн хуулийн 6.11-т “УИХ-ын чуулганы үеэр энэ хуулийн 6.9.2-т заасан санал хүлээн авсан бол ажлын хоёр өдрийн дотор гишүүний бүрэн эрхийг түдгэлзүүлэх эсэх асуудлыг шийдвэрлэнэ” гэж заажээ. Тэгэхээр Б.Батзоригийн бүрэн эрхийг түдгэлзүүлэх эсэх асуудлыг Төрийн байгуулалт, Хууль зүйн байнгын хороодын болон Улсын Их Хурлын гишүүний халдашгүй байдлын дэд хорооны санал, дүгнэлтийг үндэслэн нэгдсэн хуралдаанаар хэлэлцэж хуралдаанд оролцсон гишүүдийн олонхийн саналаар, нууц санал хураалтаар шийдвэрлэх ёстойг хуульд бичжээ.
