“СИТИ” их сургуулийн 20 жилийн ойд зориулсан Хувцас дизайны тэнхимийн багш, оюутан, төгсөгчид хамтарсан загварын шоу амжилттай зохион байгуулагдлаа. Тус шоунд Сити их сургуулийн Хувцас дизайны ангийн дөрвөн төгсөгч оюутан, хувцас дизайны гурван багш, 8 оюутны бүтээлүүд дэлгэгджээ. Шоунд нийтдээ 15 коллекцийн 150 орчим хувцас үзүүлснээс үндэсний долоон коллекц, уран сэтгэмжийн хоёр коллекц, өдөр тутмын зургаан коллекц дэлгэгдсэн юм.
“СИТИ FASHION SHOW 2018” шоунд АНУ, Франц зэрэг улсуудын элчин сайдын яамны төлөөллүүд болон ОХУ-ын Соёл Шинжлэх Ухааны төвийн удирдлагууд, хувцас загвараараа дэлхийд алдартай Япон улсын “Уйда” хувцас дизайны сургуулийн удирдлагууд болон Монголын загварын байгууллагуудын төлөөллүүд урилгаар ирж сонирхсон юм. Тус сургуулийн тухайд 1998 онд байгуулагдсан цагаасаа хойш монголын соёл урлаг, боловсролын салбарт аль хэдийн өөрийн гэсэн байр сууриа эзэлсэн, үе үеийн шилдэг төгсөгчдөөрөө овоглосон басчиг чанартай сургалттай, удирдлага тогтолцоо сайтай хэмээн салбартаа магтуулдаг гэдгийг хүн бүр мэдэх биз ээ.
Өдгөө 20 жилийн ойгоо тэмдэглэж буй Сити их сургууль нь эдийн засаг, боловсрол, соёлын салбарт өндөр мэдлэг, төлөвшил, хандлага, ур чадвартай, хүмүүнлэг иргэн бэлтгэх зорилт тавин ажиллаж, бүрэлдэхүүндээ 6 сургуультай, мэргэжлийн 40 гаруй хөтөлбөрөөр бакалавр, магистр, докторын сургалт эрхэлж байгаа юм.
ШОУНЫ ФОТО СУРВАЛЖИЛГЫГ ХҮРГЭЖ БАЙНА
О.НАНСАЛМАА