ЖДҮ бол их далай доторх мөсөн уулсын зөвхөн харагдах хэсэг. Үүний цаана 28 сан бий. Ямар сангаас хэн хэдийг авсан нь ил болох эсэх нь цаг хугацааны л асуудал. Ямартай ч тэдний олонх “цусласан” нь тодорхой болов. Саяхнаас мандсан энэ хэрэг одоогоор 12 гишүүний зээлийн баттай мэдээллээр үргэлжилж байна. ЖДҮ-г мартуулах гэж өнгөрсөн их амралтын өдрүүдийг иргэдэд бэлэглэсэн ч эсрэгээрээ иргэд ЖДҮ-ийн асуудлыг судлах хугацаа, боломж болгон ашиглав. Тэр ч битгий хэл УИХ-ыг тараах асуудал Ерөнхийлөгчөөсөө эхэлж иргэдээрээ дамжин нийгмийг нөмрөв.
Хангалттай олон хүн цуглаагүй ч талбай дээр жагсаал өрнөж, “7 сарын нэгэн”-дэхвий хэмээн эмээсэн иргэд гарын үсгээ сэмээрхэн зурчихаад гэрлүүгээ гэлдэрч харагдсан юм. Үүнийг хараад өрөвдсөн үү, үнэхээр сэтгэл зүрхэнд нь “ухамсрын шанаа” очсон уу мэдэхгүй Ерөнхий сайд маань нэр бүхий гишүүд, тэр битгий хэл УИХ-ын даргыг хүртэл сэнтийгээс нь “хөмрөх” мэдэгдэл гаргав. Ингэж “ЖДҮ-гийн хэрэг” ил болсноор төр улс тэр аяараа бужигнаж эхлэв ээ.
Үүний хажуугаар эрчийг аваад байгаа нэгэн эсэргүүцэл бол “БИД УУЧЛАХГҮЙ” цахим жагсаал. Сэтгүүлч У.Болортуяа хэсэг нөхдийн хамт цахим жагсаал зохион байгуулж, тэр нь ч түмний тавагруу өнгийсөн төрийн эрх мэдэлтнүүдийн эсрэг эрчтэйхэн явж харагдана. Жагсаалыг 11 залуу удирдаж байгаа бөгөөд түүний дотор эдийн засагч, эмч, багш, нийтлэлч, сэтгүүлч мэргэжилтэй тал талын салбарын залуу мэргэжилтнүүд байгаа нь олон нийтэд итгэл төрүүлээд байна. Бид уучлахгүй гэсэн бичигтэй цаас барьж цахимд нэгдэх бол эхний алхам. Тэд маргаашнаас УИХ-ын Ёс зүйн дэд хороонд хүсэлт, Үндсэн хуулийн цэцэд мэдээлэл, АТГ-д сонирхлын зөрчлийн тухай хууль зөрчсөн эсэхийг шалгуулахаар өргөдөл өгөх бөгөөд ардын мөнгөнөөс хумсалсан хүн нэг бүрт хариуцлага тооцох хатуу шаардлага тавьж байгаа юм. Ингэхдээ Монгол улсын тогтвортой хөгжлийн суурь нь парламентийн засаглал гэдэгт итгэдэг. Ардчилсан тогтолцооноос ухрах алхам огт хийхгүй. МАНАН-гийн аль ч хулгайчтай хамтрахгүй гэдгээ илэрхийлсэн юм.
ЖДҮХС-аас “хуссан” мөнгөний хэмжээ нь бүхэл бүтэн нэг аймагт 300-400 ажлын байр дэмжих хэмжээтэй тэнцэж байгааг ч зарим эх сурвалжууд хэлж байна. Хэрэв ингэж төрийн мэдэлтнүүд түмний сангаас түрийвчлээгүй бол мянга мянган залуус эх орондоо байх хүсэл тэмүүллээ булшилж, харийн нутагт жорлон угааж, хар амиа бодлоо гэж хараалгуулахгүй байх байсан биз ээ. Эцэст нь хэлэхэд “Ард түмэн хулгайчийг өөр нэг хулгайчаар солихыг хариуцлага хүлээж байна гэж үзэхгүй байгаа бөгөөд зүгээр л өөрсдийнхөө ёроолыг нь цоолсон завин дээрээ бүгд хамтдаа суугаад живж үхэхийг, бүрмөсөн амиа тавихыг чинь хүсээд байгаа юм”.
О.НАНСАЛМАА
