БНХАУ-ын Фүжиан мужийн Путиан хотод Дэлхийн бурхан шашинтанууд чуулж, бурхан шашины өнөөгийн нөхцөл байдал, хөгжлийн хандлагыг хэлэлцсэн байна. Бурханы шашины уламжлал, түүхтэй, бурханы шашныг хөгжүүлж буй 55 улс орны буддын шашины 1000 гаруй төлөөлөгч дэлхийн өнцөг булан бүрээс ирж оролцсон нь Дэлхийн Бурхан Шашинтаны 5-р чуулганы ач холбогдлыг өргөлөө гэж Хятадын Синьхуа агентлаг мэдээллээ. Монгол улсаас Дашчойлин хийдийн тэргүүн хамба Ч.Дамбажав, мөн хийдийн хувраг Баатарзундуй, Мамба дацан хийдийн хамба лам Д.Нацагдорж, Монголын Их Хүрээ хийдийн хамба З.Санждорж, Сайн Номун Хан хийдийн хамба лам С.Нэргүй, Сэлэнгэ аймгийн Баруун Бүрэн сумын Амарбаясгалан хийдийн хамба лам Эрдэнэчулуун ,Увс аймгийн Улаан Гом сумын Дэчинравжаалин хийдийн хамба лам Балдорж, Хэнтий аймгийн Шадүвдаржаалин хийдийн хамба лам Я.Ганбат нарын зэрэг нийслэл хот, орон нутгийн төлөөлөл урилгаар оролцсон байна. Тус чуулганы нэгдсэн хуралдаанд Дашчойлин хийдийн хамба лам Ч.Дамбажав, салбар хуралдаанд хамба лам Д.Нацагдорж, З.Санждорж нар "Монголын шашины өнөөгийн нөхцөл байдал" сэдвээр тус тус илтгэл тавьсан байна.
Чуулганд оролцсон Монголын Бурханы Шашны төлөөлөгчдийг Арваннэгдүгээр Банчин-Эрдэнэ биечлэн хүлээн авч, хүндэтгэл үзүүлэн Сахил санваараа сайтар сахиж, өөрсдөө үлгэрлэн манлайлахыг чухалчлан захиж, хоёр орны бурхан шашны харилцаа улам өргөжин дэлгэрнэ гэдэгт итгэж байна хэмээн айлтгасан гэж тус чуулганд төлөөлөгчөөр оролцсон Сандорж хамба Control.mn-ийн асуултанд хариулахдаа хэлэв. Мөн тус чуулганд оролцсон Монголын Бурхан шашны төлөөлөгчид Арваннэгдүгээр Банчин-Эрдэнийг тааламжтай үедээ Монгол улсад айлчлан ирж морилон саатахыг хүсэж заллага гардуулсан байна.
11-р Ванчин -Эрдэнэ. Бурхан шашинтаны томоохон зүтгэлтэн. Нэгэн цагт Түвд бурхан шашинтаны тѳв байсан уламжлалыг залгамжуулж буй.
Д.ЖАРГАЛ