Ерөнхий сайд У.Хүрэлсүх бодолдоо дарагджээ. Түүний тэргүүлэх Засгийн газар бүтэлгүйтэж, дордохын долоо бүдрэв. Түүний гаргасан шийдвэрийг дагахаа нэгэнт больжээ. Ерөнхийлөгчийн хоригийг тэрбээр Засгийн тэргүүн, эрх баригч намын даргын хувиар хүлээн авсан ч хүчирхсэнгүй. Сангийн сайд нь ч 2 хоног суучихъя гэж учирласан ч, түүний кабинетад голлох үүрэг бүхий Нямдорж сайд бүхий гишүүд тэгнэж хэвтээд, хоригийг хүлээн авахгүй гэдэг шийдвэр гаргалаа. У.Хүрэлсүх Засгаа барьж буйн хувьд ч, УИХ-д олонх болсон МАН-аа тэргүүлж намын даргын хувьд ч " цохилт" авлаа. Түүний нам түүнд хүчрэгдэхээ больжээ. Ялангуяа УИХ-ын гишүүд түүнд " ҮГҮЙ " гэж хэлэх нь ихэссэн байна. У.Хүрэлсүх УИХ-ын гишүүн бус тул түүний сул талыг мэдрүүлж эхэлсэн байна. Тиймээс бодол болсон ерөнхий сайдад Засгийг тараачих, тэр бүү хэл УИХ-ыг тараачих бодол үе үе төрж эхэлсэн байна. Засаг унах дээрээ тулбал тэр юу ч үгүй хоцорно. Намаа ч алдах нь ойлгомжтой. Тиймээс Засгаар оролдвол, УИХ-аар давхар оролдоно гэх тактикийг тэр боловсруулжээ гэж бодогдох болов. - Би дахин МАН-ын өмнөөс барилдахгүй. Гишүүддээ хандана. Өөрчлөлтийг хийж чадахгүй бол ард түмнээсээ дэмжлэг хүснэ. Болохгүй бол өөрөө огцорно. Та бүгд намайг дэмжээрэй. Ийм л зам надад байна гэж тэр дүгнэх болсон байна. Тиймээс намаа зангидаж чадахаа больсон учир, анхаарлаа талбай руу хандуулах болжээ. Жагсаал цуглаан хийх ард иргэдийн төлөөллийг ордонд хүлээн авч уулзаад байгаагийн цаад учир ч , үүгээр илэрч мэдэх нь. Ямар ч гэсэн Засгийн ажил царцаж, Засгийн тэргүүний толгойд ч Засаг, УИХ-ыг тараах санаа бодол орж гарах болсон байна.
УИХ-ын гишүүн Ц.Нямдорж. УИХ-д хамгийн олон сонгогдсон, мэргэшсэн парламентч гэж болох улс төрч. Хамгийн зангарагтай, нөлөө бүхий гишүүнд тооцогддог. Ерөнхийлөгч, ерөнхий сайд, УИХ-ын дарга, эрх баригч намын даргын хэнтэй ч " чи, би" гэдэг нэг төвшинд харьцаж чаддаг. Хамгийн сүүлд ЕТГ-ын дарга З.Энхболдыг зэмлэсэн. Өш хонзон өвөрлөдөг, төрийн 3 өндөрлөгийн хооронд " яс хаяж" зодолдуулах санааг агуулдаг, төсвийн хориг нэрээр улс орны санхүүгийн тогтворгүй байдлыг үүсгэхийг санаархлаа гэж үзэн хоригийг бүхэлд хүлээн авахыг эрс татгалзсан. Кабинетын гишүүний хувьд Ерөнхий сайд, сангийн сайдын саналын эсрэг зогсож чадахаа харуулсан төдийгүй, гишүүдэд нөлөөлж, хоригийг хүлээн авахаас татгалзах шийдвэр гаргуулж чадсан.
Ц.ЭНХБАТ