Ерөнхий сайд У.Хүрэлсүх унаж ч болно, тогтож ч болно. Түүнийг элдвээр хэлж, харааж, зүхэж болно. Тэр хэлсэн ярьсандаа хүрээгүй, улс орныг олигтой удирдаж чадаагүй байж болно. Намаа нэгтгэж, 65-ын бүлгээ нэг гарт зангидаж чадаагүй байж болно.
Гэхдээ л У. Хүрэлсүхийг ямар ч хувь заяа маргааш хүлээж байлаа гэсэн Монголын их улс төрийн түүхэнд түүний нэрийг алтаар биш юм аа гэхэд хүрлээр бичиж үе дамжуулан үлдээнэ.
Тэр бол Оросуудын хэлж заншсанаар жинхэнэ "мужик" (эр хүн) юм. Нэхэн санавал, Н.Энхбаярыг "хаан" байх үед - Та манай намыг удирддаг юм уу, Таны эхнэр Цолмон удирддаг юм уу? хэмээн айж эмээлгүйгээр хэлж чадсан зориг, зүрхтэн бол У.Хүрэлсүх. Түүнээс өөр "хааны" өөдөөс эгц харж байгаад ингэж хэлчих зүрхтэн олдоогүй. Тэр амьдрал төгсөхөөс айж эмээгээгүй. Шударга гэгдэх Ц.Нямдорж ч хаяагаа манаж байсан цаг үе. Хожим УИХ-ын гишүүнээр сонгогдсоны дараа ч, асуудал үүсэхтэй зэрэгцэн эрх ямбаасаа тэр л татгалзаж чадаж байсныг санахад илүүдэхгүй. Өнөөдөр сайн муугаар элдвээр хэлүүлж, цоллуулж байвч, тэр Монголын төрд гавьяагаа үнэлүүлнэ. Түүний гавьяа бол Монголын баялгийг сорчилон хувьдаа завшсан, нам дамнасан улс төр, эдийн засгийн МАНАН бүлгийг нураах алхмыг тэр эхлүүлж чадсанд оршино.
Харин энэ тэмцлээ дутуу орхиж хэрхэвч болохгүй. Замын дундаас буцаж болохгүй. Тиймээс МАН-ыг таллан хуваасан "ялыг" МАН-ын гишүүд, дэмжигчид У.Хүрэлсүхээс биш МАНАН бүлэглэлээс асуувал зохино. Тэр муу удирдагч, тааруухан ерөнхий сайд байж болно. Харин тэр Монголын төрийг цэвэрлэх үүрэгтэй төржээ. Тиймээс түүний алдаа бүхнийг уучилья. Гагцхүү МАНАН бүлгийг дарж, нийгмийг цэвэрлэж өгөхийг түүнээс хүсье. Хүрэлсүх Монголын түүхэнд ерөнхий сайдаар бичигдэхгүй юмаа гэхэд, Монголын төрийг цэвэрлэсэн "баатрын дүрээр" бичигдэнэ гэдэгт эргэлзэх зүйл алга. Тиймээс У.Хүрэлсүхийг зөвтгөж байна.
Эр зоригтон нийгэмд хэрэгтэй. Бэртэгчидтэй хүний хэлээр яриад ойлголцохгүй бол хүчээр ярих нь дээр.
Ц.ЭНХБАТ
