Авилгатай Тэмцэх Газар гол үүргээ биелүүлээгүй. Ард иргэдийн татвараар санхүүждэг хэрнээ ард иргэддээ үйлчлээгүй. Ихэс дээдсийн эрх ашигт хөндөлсөхийг санаархсан хэн бүхнийг "арчин зайлуулах", зарим улс төрчдийн зүйрлэн хэлснээр улс төрийн захиалгаар намнадаг, ажилладаг болсон гэсэн шүүмжлэлд сүүлийн жилүүдэд бүрэн өртсөн.
Энэ байгууллагын нэр хүнд унажээ. Дарга удирдлагад нь жирийн ард иргэд итгэл алдарчээ. Энэ байгууллага бол ганц Энхжаргал дарга бус. Тэгэхээр яалтай билээ. Нэгэнт хуулиар байгуулсан АТГ-ыг татан буулгалтай биш. Арга бодох цаг, ухаан сийлэх цагтай тухай тулгарчээ. Татан буулгаж болохгүй учир энэ байгууллага, түүний өнөөгийн удирдлагын бүрэлдэхүүнд итгэл үзүүлэх талаар олон нийтийн санал асуулгыг өрнүүлэх нь зөв байж болох. Ард иргэд итгэл үзүүлээгүй тохиолдолд тус байгууллагын бүх шатны удирлагыг бүрэн бүрэлдэхүүнээр огцруулж, шинээр цогцлоон байгуулах нь зөв юм гэж бодогдоно. Энэ байгууллагын өнөөгийн удирдлага Авилгатай Тэмцэх Байгууллагынхаа үүрэг зорилгыг ч сайтар ухамсарлаагүй байна гэж үзэх үндэслэл байна. АТГ-ын гол зорилго нь барьж хорихдоо биш, авилгад өртөхөөс урьдчилан сэргийлэх юм. Энэ зорилгоо Хурц ч, Ганболд ч, өнөөгийн дарга Энхжаргал ч умартсан байна. Зөвхөн дарга нарт буруу өгөөд зогсохгүй, аппарат нь ч ойлгосонгүй. Тиймээс ганц дарга Энхжаргал биш, бүх шатны дарга, удирдах бүрэлдэхүүнийг нь үүрэгт ажлаас нь чөлөөлж, даргад биш өргөсөн тангарагтаа үнэнч байж чадах мэргэжлийн багийг томилох нь зөв юм гэсэн санааг дэвшүүлж байна.
Бөхийн өргөөг хэдэн сараар хааж, лацдаж болсон юм чинь, АТГ-ыг ард иргэдийн итгэл үзүүлтэл лацдаад, данс тооцоог нь хаавал яасан юм бэ. Шударга иргэдийг айлган сүрдүүлдэг байгууллага бий болгох гэж АТГ байгуулаагүй. Энэ бол АТГ-ыг байгуулсан зорилгод үл нийцнэ. Тиймээс энэ байгууллагад итгэл үзүүлэх эсэх талаар бүх нийтийн санал асуулгыг явуулья. Та бас саналаа хуваалцаарай.
Ц.ЭНХБАТ
