Өнөөдөр Баянгол зочид буудлын гадна хөл ихтэй байлаа. Учир нь Женко Баттулгын Баянгол зочид буудал дахь ажлын өрөөнд нь цагдаагийн бие бүрэлдэхүүн нэвтэрч, тодорхой хэмжээний үзлэг хийсэн тухай мэдээлэл цацагдсан. 6 цаг үргэлжилсэн үзлэгийн төгсгөлд цагдаагийнхан Х.Баттулгын хоёр компанийн үйл ажиллагаанд шалгалт үзлэг хийсэн нь тодорхой боллоо.
" Баялгийн хувь "," Түмэн хишигтэн " хоёр компанийн эд хөрөнгийг битүүмжилснээр өнөөдрийн шуурхай ажиллагаа өндөрлөлөө. "Хоёр компанийн үйл ажиллагааг шалгахын тулд ингэж хүч хэрэглэлээ. Үүний ард захиалагч бий. Энэ эзэн нь удахгүй тодрох байх гэж найдаж байна" гэж Х.Баттулга хэвлэлийнхэнд хандаж үг хэллээ. Тэр спорт маягаар хувцаслаж, пальто өмссөн байлаа.
Харин түүнтэй хамт Баянхонгороос сонгогдсон УИХ-ын гишүүн Д.Ганбат "Х.Баттулга бол Баянхонгороос гурван удаа сонгогдсон гишүүн. Энэ ч арай дэндэнэ ээ" гэхээс өөр олигтой үг хэлж чадаагүй бол, УИХ-ын гишүүн Эрдэнэчимэг " Энэ бол Таван толгой.
Таван толгойтой холбоотой баривчилгаа үргэлжилж байна. НАМ дамжсан олигархуудын хийж буй улс төрийн чанартай үйл ажиллагаа. Таван толгойн асуудал нэг тийшээ шийдэгдтэл, энэ баривчилгаа зогсохгүй. Бид энд ирснээр хэн нэгнийг нэмж баривчлах боломж олгосонгүй. Өнөө өглөө гэхэд л, 08.45 минутад Х.Баттулгын бас нэгэн туслах эмэгтэйг гэрээс нь баривчилсан. Эд нар эмэгтэйчүүдийг баривчилсаар байна. Бид ийм боломж олгохгүй. Одоо цаашдаа УИХ-ын сонгуулийн хуулийг өөрчлөх талаар ажиллах болно. Жагсаалтын ард нуугдаж, төрийн эрх барих хүсэлтэй хүмүүсийн хүслийг талаар болгоно" гэж шийдэмгий хэллээ.
Энэ хоёр дээр нэмэгдсэн Г.Уянга гишүүн " Энэ бол улс төр. Одоо бид хууль зүйн байнгын хороон дээр Тавантолгойн асуудлыг нээлттэй хэлэлцэх хэрэгтэй гэдэгт санал нэгдлээ." гэж хуран цугласан олонд хандаж үг хэллээ.
Тэд удахгүй хэвлэлийн бага хурал хийнэ гэдэг мэдээлэл цацагдлаа. Тэдний ангийнхнаас өөр гишүүн Х.Баттулгыг дэмжихээр ирж харагдсангүй.
Д.ЭНХТҮВШИН