Монгол, ОХУ, БНХАУ гурван улсын гоо бүсгүй шалгаруулах Манжуурын олон улсын XV уралдаан Өвөр Монголын өөртөө засах орны Манжуур хотод 12 дугаар сарын 23-нд боллоо.
Хятад, Орос, Монголын 60 гоо бүсгүй өрсөлдсөн уг тэмцээний тэргүүн болон дэд байрыг Монголын гоо бүсгүйчүүд эзэлсэн бол Оросын гоо бүсгүй гуравдугаар байранд орсон байна.
Тэргүүн миссээр Монгол Улсаа төлөөлөн оролцсон Отгонтэнгэр Их Сургуулийн гуравдугаар курсийн оюутан Г.Содгэрэл тодорчээ. Тэрбээр Эрдэнэт хотоос оролцсон бөгөөд өмнө нь олон улсын аялал жуулчлалын “Miss-2018” уралдааны шилдэг оролцогчоор шалгарч байсан юм.
Дэд байрт Монгол Улсын гоо бүсгүй Б.Азжаргал, харин гуравдугаар байрт ОХУ-ын гоо бүсгүй Фухт Юлия нар шалгарсан байна.
“Эрүүл, Үзэсгэлэн, Энх тайван, Найрамдал” уриатай Хятад, Монгол, Орос улсын гоо бүсгүй шалгаруулах олон улсын уралдаан гурван орны соёлын харилцаа, хөрш орнуудын найрамдлыг бэхжүүлэх, бүс нутгийн хамтын ажиллагааг гүнзгийрүүлэх чухал индэр, соёлын брэнд болсон гэж зохион байгуулагчид онцолжээ. Мөн зохион байгуулагчдын зүгээс нийт өрсөлдөгч гоо бүсгүйчүүдийн олонх нь өндөр боловсролтой охид байсныг онцлон дурдсан байна.
