Хууль хүчний байгууллагынхан хэн нэгний захиалгаар ажиллах болсон тухай шүүмжлэл нэлээд гарсан. Зүгээр ч нэг шүүмжлэл биш, нийгэм олны анхаарлыг татсан үгийг УИХ-ын дарга З.Энхболд, УИХ-ын гишүүн Н.Алтанхуяг, Лу.Болд нарын зэрэг эрх барьж байгаа намынх нь гишүүд хэлэх болсон. Тэгвэл, УИХ-ын гишүүн Х.Баттулгын хувь эзэмшдэг хоёр ч компанийн үйл ажиллагааг шалгахаар прокурор, цагдаагийн байгууллага хүч хавсран хөдөлсөн нь, энэ дайран дээр давс асгахтай адил боллоо. Эрх баригч намын удирдлагын зүгээс бодлогын шийдвэр гарч эхэллээ. АН-ын ерөнхий нарийн бичгийн дарга Л.Эрхэмбаяр :
- ЦЕГ-ын даргыг дангаар нь солиод энэ бүх баривчилгаа, хэлмэгдүүлэлт зогсохгүй. Хүчний бүх байгууллагын удирдлагыг солих цаг болжээ" гэж хэлсэн.
Өмнө нь ч, - "Хүчнийхэн Монгол төрийн жолоог атгаж байна" гэж Алтанхуягийн хэлсэн үг замхраагүй байна.
- "Цагдаагийн байгууллагын даргыг сольё" гэж Оюунгэрэл гишүүн хэлсэн тухай ордноор нэг ярьж байна. Ямар ч гэсэн өөрчлөлтийг ЦЕГ-ын дарга Р.Чингисээс эхлэхийг шахах бололтой.
Дараа нь бие бүрэлдэхүүнд өөрчлөлт оруулна. Тэгээд л бусад хүчний байгууллага, тухайлбал АТГ руу энэ өөрчлөлт үзүүрээ чиглүүлэх бололтой. Цагдаагийн дарга нар улс төрчдийн золиос болох нь уу, юу болох нь вэ? Гэдгийг удахгүй харах цаг ирэх нь ээ.
Д. ГАНТУЛГА
