Английн шигшээ баг болон Тоттенхем клубийн довтлогч Харри Кейн гуравдугаар сар хүртэл талбайд гарах боломжгүй болов. Тэрбээр бэлтгэлийн үеэр шагайдаа бэртэл авч чухал тоглолтуудыг өнжихөөр болжээ.
Тоттенхем клуб Кейнгүйгээр лигийн цомын тэмцээний хагас шигшээд Челси клубтэй, аваргуудын лигийн шөвгийн 16-д Германы Бориусса Дортмундын эсрэг хоёр тоглолт хийх юм. Мөн ирэх улирлын аваргуудын лигийн эрхийн төлөө өрсөлдөж буй тэд премьер лигийн зургаан тоглолт хийнэ. Харри Кейн премьер лигийн мэргэн буучдын жагсаалтын Мухаммед Салагийн хамтаар 14 гоолтой тэргүүлж байгаа юм.