Монголын Үндэсний Олимпийн Хорооны ерөнхийлөгч Загдсүрэн эрүүл мэндийн шалтгаанаар үүрэгт ажлаасаа сайн дураараа татгалзсан нь ээлжит марафоныг эхлүүлсэн байна. Өмнө нь энэ албан тушаалыг сонирхож байсан Голомт банкны үүсгэн байгуулагч Баясгалан, ерөнхий прокурор асан Дорлигжав нар хууль хяналтын байгууллагад шалгагдаж буй энэхүү марафоноос хасагдсан.
Харин Загдсүрэнтэй өрсөлдөж ялагдсан УИХ-ын дарга Энэбиш агсаны хүү Мөнх-Очир энэ суудлыг ихээхэн сонирхож буй, зүтгэж буй. Түүнийг Монголын Үндэсний Олимпын Хорооны дарга болгох багт Даамны холбооны Бат-Эрдэнэ, Оюутны холбооны Жаргалсайхан, Ширээний теннисний холбооны ерөнхийлөгч Гантулга, тэргүүлэгч Амарсанаа, Одод телевизийн захирал Тамир нар хүчин зүтгэж буй. Тэд Загдсүрэнгийн сонгогдсон сүүлчийн хуралдааныг хүчин төгөлдөр бус гэж үзэж, шүүхэд хандсан мэдээлэл ч сонсогдоно. Хэрвээ сонгууль хууль бусаар явагдсан гэж шүүхээр тогтоогдвол, дахин хурал хийлгүйгээр Мөнх-Очирыг Загдсүрэнгийн залгамжлагчаар шууд зарлахаар зэхэж байна.
Харин нөгөө талаас хурлаа хийх, нэр дэвшихээр зэхэж буй кандидат бол ерөнхий сайд асан Сү.Батболдын хүү, "Чингис" зочид буудал, Е-Март худалдааны төвийн эзэн Баттүшиг гэж зарим эх сурвалж мэдээлж байна. Өнгөрсөн 1-р сарын 25 хийхээр төлөвлөсөн Олимпийн хорооны хурал Шүүхийн шийдвэр гарахаас ийнхүү хамаарах болжээ.
Монголын Үндэсний Олимпийн Хорооны даргын марафонд өрсөлдөгчдийн нэр ийнхүү тодорчээ. Ерөнхий сайдын хүү, УИХ-ын даргын хүү хоёрын хэн нь энэ өрсөлдөөнд ялах бол ?
Э.ОТГОО