Ховд аймгийн Буянт сумын харьяат улсын харцага Оргихын Хангай гэж залуу сүүлийн үеийн барилдаануудад гойд сайн барилдаж байна. Улсын арслан Ш.Ванчинхүүгийн удмыг залган зодоглож буй энэ хүчтэн 2018 оны төгсгөлд БНСУ-ын үндэсний бөх шрым бөхийн барилдаанд түрүүлсэн. Дараахан нь Өмнөд Монголын Алтан бүсний төлөөх барилдаанд ч манлайлсан юм.
Сүүлд Ерөнхийлөгчийн цомын төлөөх чансаа өндөр 128 бөхийн барилдаан болон Шинэ Үндсэн хуулийн өдрийн барилдаануудад дараалан түрүүлж спортод шинэ од төрөн гарч буйгаа зарласан. Цаашдаа ч олон барилдаанд түрүүлэх төлөвтэй байна. Ар Монгол ч, Өмнөд ч тэр Хангайгаар амьсгалж байна.
Бөх сонирхогчдын ярианы гол сэдэв болоод буй О.Хангайг жудагтай төлөв даруу эр болгож төлөвшүүлэх нь хөгжөөн дэмжигчдийнх нь үүрэг. Нэр алдарт хүрсэн тамирчин, урлагийнхныг шүтэн бишригчид нь л эвдэж оддын өвчин тусгадаг. Тэр дундаа бөхчүүдэд улсын цол хүртэхэд нь л байр сав, машин тэрэгнээс авахуулаад цэрэг цагдаагийн цол хүртэл олгодог жишиг одоо ч манайд бий. Ийм жишгээр л тамирчин хүнийг эвдчихдэг. Монгол бөхчүүдээ хүндэлдэг, дээдэлдэг бид шинээр гарч ирж буй залуу бөхөө ийм жишгээр эвдмээргүй байна. Хангайг жудагтай зөв явбал даваад тугаа тойроход нь дагаад тулгаа тойрч дэвж, дэмждэг хүүхдүүд ч түүнээс үлгэрлэнэ. Хүн хүндэлдэг, биширдэг хүнээ л дагаж дууриадаг, түүнээс суралцдаг шүү дээ. Иймээс спортын оддыг ёс суртахуунтай байлгахын тулд анхаарч ажиллах хэрэгтэй. Төрөөс бодлогоор шахаж шаарддаг байсан ч болохгүй зүйл байхгүй. Ингэж гэмээнэ хүүхэд залуусын даган дууриадаг одод тэдэнд зөв үлгэр үзүүлэх учиртай. Өнөөдрийн дархан аваргууд шиг шуналтай, ёс суртахуунгүй, дээрэнгүй байвал хойч үе залуус нь ийм л хүмүүжилтэй болж төлөвшинө. Бөхийн дэвжээнд нэгнээ цохидог, унасан хойно нь нидэрдэг, өвдөг шороодсоноо хүлээн зөвшөөрдөггүй, жудаггүй зан өмнөх үеийн дархан аваргуудтай холбоотой гэхэд хилсдэхгүй биз. Хар тамхи татаж, газ үнэрлэж мансуурч буй өсвөр үеийнхэнд урлагийн одод буруу үлгэр дууриал үзүүлсэн гэдгийг хэн, хүнгүй мэдэх болсон.
Залуусын нүдний өмнө гялалзаж буй Хангай харцага сүмогийн аваргууд шиг дээрэнгүй, өнөөдрийн дархан аваргууд шиг шуналтай байвал шүтэн биширч даган дууриадаг залуус ийм л болж төлөвшинө гэдгийг дахин онцолъё.
Төлөв даруу, жудагтай зангаа хадгалж үлдвэл залуус ч түүнээс ихийг сурах биз ээ. Өнөөгийн бухимдалтай нийгэмд хүлээцтэй, ёс суртахуунтай, боловсон иргэд юу юунаас илүү үнэ цэнэтэй болсон. Харин ийм иргэдийг нийгэмд бий болгоход спорт, соёл урлагийн оддын биеэ авч явж буй байдал, ёс суртахуун тун чухал үүрэгтэй юм.
О.ДАШ
