Хамгийн залуу гишүүн гэгдэж байсан Гантулга өөрийн болчимгүй үйлдлээс болж "тахимаа" өгсөн. Түүний суудал УИХ-д онгойж, нөхөн сонгуулийн тов зарлагдлаа. Энэ нөхөн сонгуульд АН, МАХН, МАН оролцох сонирхлоо хамгийн түрүүнд илэрхийлсэн.
МАН-ын зүгээс аймгийн засаг дарга Ганбямбыг өмнө нь дэвш гэсэн чиглэл өгсөн ч, - Би дэвшээд ялалт байгуулж чадахгүй. Тиймээс дэвших хүсэлгүй байна гэж Ганбямба үнэнээ хэлж, нэр дэвшихээс татгалзсан бол, -Би нэр дэвшиж, өрсөлдөхгүй гэж дөнгөж намын даргын тамгаа авсны дараа У.Хүрэлсүх хэлж, гишүүдийнхээ бухимдлыг төрүүлж байсан.
Харин өнөөдөр нөхцөл байдал эргэж МАН-ын рэйтинг унасан ч, У.Хүрэлсүхийн хувь хүний рэйтинг өссөн байна. Үүнийг Control.mn-ийн хамгийн сүүлийн тандалт ч илтгэсэн байна.
Өнгөрсөн Ням гарагт МАХН-ын дарга Н.Энхбаяр Хэнтий аймагтай хамгийн ойрхон оршдог, Хэнтий аймгаас малын мах, сүү, сүүн бүтээгдэхүүнийхээ дийлэнхийг татдаг Амгалан захын худалдаачид, тэнд үйлчлүүлж байсан иргэдтэй уулзсан байна. Уулзалтын өмнө манай баг тандалт хийж амжив. Лангууны худалдаачдын дийлэнх нь эхэндээ; -Энхбаяр л гарна шүү дээ. Хаалт байхгүй гэж хэлж байсан бол, сүүл рүүгээ;- Ганц хүн л Н.Энхбаяртай өрсөлдөнө. У.Хүрэлсүх дэвшвэл бараг гарчих байх шүү гэж хэлж байлаа.
СЕХ-ны нарийн бичгийн дарга Болдсайхан, - Нийт улс төрийн 31 намын 27-д нь зөвлөмж хүргүүлсэн. Сүүлд байгуулагдсан 3 нам нөхөн сонгуульд оролцох эрхгүй. Төрийн албан хаагчид нэр дэвших эрхийг нээсэн. Ажлаасаа чөлөөлөгдөх өргөдлөө өгсөн байх учиртай. Сонгуульд оролцох улс төрийн намууд нөхөн сонгууль эхлэхээс 37 хоногийн өмнө нэр дэвшигчээ СЕХ -нд бүртгүүлнэ. Өмнө нь улс төрийн 14 нам нөхөн сонгуульд оролцох хүсэлтээ илэрхийлж байсан. МАХН-ын дарга Н.Энхбаяр энэ нөхөн сонгуульд өрсөлдөхөд ямар ч саад байхгүй гэдгийг ч давхар тодрууллаа.
Ийнхүү нөхөн сонгууль гол гурван тоглогчтой. Үндсэн хоёр өрсөлдөгчтэй гэж үзэж болох нь. Хэрэв У.Хүрэлсүх нөхөн сонгуульд нэр дэвшихээс дахин зайлсхийвэл МАХН УИХ-д 2 суудалтай нам болж, байр сууриа улам бэхжүүлнэ. Ц.Элбэгдорж энгийн нэгэн болж, Энхбаяр төрийн түшээгээр өргөмжлөгдөх нь цаг хугацааны асуудал болжээ.
Ц.ХИШГЭЭ
КОНТРОЛ МЕДИА БЭЛТГЭДЭГ НЭВТРҮҮЛГҮҮДЭЭС...
"КОММЕНТАТОР"
"ЗАМ ЗУУРЫН ХӨӨРӨЛДӨӨН"
"МИНИЙ АЖЛЫН ӨРӨӨ" НЭВТРҮҮЛЭГ