Шудрага Өрсөлдөөн Хэрэглэгчийн Төлөө Газраас 2019 оны нэгдүгээр сард Зар сурталчилгааны тухай хуулийн хэрэгжилтийг хангах хүрээнд хяналт шалгалт хийсэн. Зар сурталчилгааны тухай хуульд хатуулаг багатай дарс, пиво, шимийн архины зар сурталчилгааг сонин, сэтгүүл, радио, телевиз, интернэтээр хэрхэн түгээх талаар тодорхой заасан байдаг.
Гэтэл хуулиар хориглосон хууль бус сурталчилгааг зарим аж ахуй эрхлэгчид ялангуяа цахим орчноор тэр дундаа фэйсбүүкээр согтууруулах ундааны хэрэглээг уриалсан шинжтэй , төрөл бүрийн сугалаа, хонжвор урамшуулалт худалдааг зарласан зар сурталчилгааг түгээж байгаа зөрчлүүд илэрсэн байна.
Тухайлбал хяналт шалгалтын хүрээнд “Наран Март ”ХХК нь 2019.01.21-2019.01.27-ыг дуустал архины хямдралтай худалдаа хийх зар сурталчилгааг өөрийн фэйсбүүк хуудсанд байршуулсан, “Наран супермаркет” 2019.01.21-2019.01.27-ыг дуустал архи согтууруулах ундааны төрөл зүйлээр “Өдрийн мэнд хүргэе,Наран Фүүдс компани хэрэглэгчид та бүхэндээ Австралийн үндэсний баярыг тохиолдуулан Австрали брендийн танилцуулах өдрүүдэд урьж байна” гэх уриалга текст бүхий зар сурталчилгааг түгээсэн зөрчил илэрчээ.
Энэ нь "согтууруулах ундааны үйлдвэрлэл, импорт, худалдаа үйлчилгээний талаар төрөл бүрийн сугалаа, хонжвор аливаа хэлбэрийн урамшуулалт худалдаа явуулахыг хориглоно" гэж заасныг зөрчсөн тохиолдлууд болж байгаа талаар мэдээллээ.
З.НУРЖАН