Монголын олон салбар гажуудсан. Танхим ч түүний нэг жишээ болжээ. Монголын бизнесийн акулууд нэгдээд Их Хурлаараа баталсан дүрэм нь ч хөгжилд саадтай. Танхимын ерөнхийлөгч, Танхимын дарга гэдэг хоёр сонгуультантай. Одоогоор Лхагважав, Оюунчимэг гэж олон толгойтой могой гэдэг шиг удирдлагын бүтэцтэй. Дээр нь дэд ерөнхийлөгч нарыгаа ч бас Их Хурлаасаа сонгосон. Хэн хэндээ ч захирагддаггүй. Үүрэг даалгавар өгөх, тайланг нь сонсох боломжгүй. Гадны байгууллага танхимын ерөнхийлөгч, танхимын даргын хэнтэй нь харьцахаа, тэдний статусыг ойлгоход бүрхэг. Ийм л дүрмийг баталснаар энэ байгууллага сүүлийн 4 жил мунгинажээ. Ядаж байхад Танхимын ерөнхийлөгчийг Удирдах Зөвлөлөөс томилдог тул Удирдах зөвлөлдөө барьцаалагдсан ерөнхийлөгчтэй. Танхим удирдлагын түвшиндээ зөрчилдөөнтэй дөрвөн жилийг барж байна. Өөрийн гэх байр оронтой. Үүнийг өмнөх дарга Дэмбэрэл босгосон гавьяа зүтгэлтэй. Дан ганц өргөө байр биш, мөн 7 тэрбум төгрөгийг өвлүүлсэн гэдэг. Одоогоор Танхим жилийн 4 тэрбумын орлоготой гэх. Түүнийгээ ч ил тод тайлагнадаггүй нь гишүүдийн дургүйцлийг төрүүлж байна.
Өмнөх Дэмбэрэл даргын үед өвлүүлэн үлдээсэн гэх 7 тэрбум төгрөгийг Танхимын дарга Оюунчимэг Хас банкинд хадгалуулсан сураг ч дуулдана. Ханшийн зөрүүгээр энэ мөнгөний дүн хэд болсныг гишүүд асуухаар зэхэж байна. Одоогоор Танхимын ерөнхийлөгч Лхагважав, дарга Оюунчимэг хоёр нь бие биенээ шүүх, хуулийн байгууллагад харилцан өгсөн мэдээлэлтэй Их хуралтайгаа золгож байна. Тэд өөр хоорондоо хэрэлдэж хүчээ барснаар, гишүүдийнхээ сайн сайхны төлөө ажиллаж чадсангүй гэх дүгнэлтийг хийж болох нь.
Ц.ХИШГЭЭ
