Хуулийн байгууллага дахь хүний эрхийн зөрчил, цагдан хорио, эрүү шүүлт асуудал дагуулах болсон. Сонгуулийн өмнө С.Зоригийн хэрэг дахин сөхөгдөж, уг хэргийн цорын ганц гэрч болох талийгчийн хань Булганыг хэрхэн хорьж цагдаж, хүний эрхийг хэрхэн зөрчиж байсныг Лу.Болд, Оюунгэрэл гишүүн нар ил болгож, дэлгэж байсан.
Тэгвэл Бямбаа хуульч хорих 461 дүгээр ангид амь насаа алдсан. 48 цаг баривчилж, суллагдахаас 3-хан цагийн өмнө амиа хорлосон гэх мэдээллийг албаны эх сурвалж мэдээлсэнтэй талийгч Бямбаагийн гэр бүл, үр хүүхэд эвлэрэхгүй байгаагаа илэрхийлсэн. Мэдэгдэж, ил болж буй нь энэ төдий. Төрийн зүгээс ШШГЕГ-ын дарга, генерал Амгаланбаатарыг ажлаас нь чөлөөлснөөр асуудлыг зөөллөнө гэж бодож байх шиг.
Тэгвэл энэ хэрэгт Оросоо тэргүүтэй хуульч, өмгөөлөгчид анхаарал хандуулж буй. Өнөөдөр тэд Хүний Эрхийн Үндэсний Комиссын гишүүн Оюунчимэгтэй энэ асуудлаар санал солилцсон байна. Хорих ангид хоригдож буй иргэний амь насыг төр хариуцах учиртай. Тэр тусмаа томоохон хэрэгт холбогдон татагдсан сэжигтэнг амиа хорлох оролдлого хийвэл зогсоох, хянах, үүргийг хянагчид хүлээдэг. Тэгвэл энэ үүргээ умартав уу? Эс бөгөөс ар гэрийнхэн үзэж буйгаар амийг нь хороов уу? гэдэг асуудал дэгдэж буй. Тиймээс Хорих ангид хоригдож буй иргэдийн нөхцөлийг сайжруулах зайлшгүй шаардлага үүссэн байна. Эс бөгөөс улам даамжрах магадлалтай.
Ц.ХИШГЭЭ
