Төв аймгийн Сүмбэр сумын II багийн нутаг Баруун тахилгат уулын энгэрт байрлах "Альтайр гоулд” гэх алтны компанийн байдал улам бүр газар аван хүрээгээ тэлж тариалангийн талбай, хэд хэдэн малчдын өвөлжөөний газрыг дайруулан 2 метр гаран өндөртэй хэрэм цайз мэт хашаа хатгаж сумын газар нутгийг ухаж сэндийчсээр даруй хэдэн жилийн нүүрийг үзжээ.
Монгол Улс газар тариаланг дэмждэг байтал тариалангийн талбайд ийнхүү алт ухаж байгаад нутгийн иргэд бухимдалтай байна. "Сүмбэр сумын тухайд газар нутгийн хэмжээгээрээ багад тооцогддог. Ийм атал атгахан газрынхаа баялгийг хэн нэгэнд дур мэдэн өмчлүүлж, ашиглуулчихаад өөрсдөө хараад суух нь эмгэнэлтэй байна" гэдгээ нутгийн ард иргэд удаа дараа илэрхийлж байсан ч тусыг эс олжээ.
Сумын төвөөс холгүй 5-хан км байрлах тус алтны компани 2009 оны тавдугаар сарын 9-нд лиценз авсан бөгөөд "Альтайр гоулд” компанийн лицензийн талбайд одоогоор 300 гаруй тонн алт байгаа гэсэн урьдчилсан тоо гарсан байна.
"Атгахан газраас алт ухах нь бидэнд ашигтай юу ? Арвай буудайгаа тариалан хэрэглэх нь бидэнд ашигтай юу ?" гэж нутгийн иргэд халаглаж сууна.
.jpg)
Энэ талаар бид үргэлжлүүлэн мэдээлэх болно.
Б.УУГАНАА
