"Түмний-76" үндэсний сэхээтний хөдөлгөөнөөс зарласан нэрс ийнхүү уншигч, үзэгч, сонгогч Таны өмнө дэлгэгдэж байна. Өмнөтгөл болон дурдахад, МАН, АН Монголын төрд ноёрхлоо тогтоосон 30 жилд Монгол улс уруудан доройтсон. Монгол улсын гурван иргэний нэг нь нэн ядуу болсныг олон улсын болон дотоодын мэргэжлийн байгууллагын удаа дараагийн судалгаа ил болголоо. Монгол улсын хөгжлийн гол тулгуур болсон монгол хүн гээгдэж, дундаж давхарга өдрөөс өдөрт нимгэрч, ядуусын эгнээ рүү гулсахад бэлэн болсон нь түгшүүрийн харангыг дэлдэж байна. Энэ завсар Монгол улсын газрын хэвлийд 3 их наяд ам.долларын нөөц буйг Олон улсын байгууллага тогтоож, энэ баялгийг иргэддээ хуваабал, Монгол улсын нэг иргэнд нэг сая ам.доллар оногдож буй. Энэ тоо бол ойрын жилүүдэд хөгжлөөрөө биш юм гэхэд, оногдох баялгаараа монголчууд нэн даруй Швейцарь, Японыг ардаа орхих бодит тоон үзүүлэлт. Гэтэл шавхагдашгүй арвин баялагтай улсыг ядуу улс орны тоонд, ард иргэдийг нь аз жаргалгүй иргэдийн эгнээнд нэгтгэсэн буруутныг сүүлийн 30 жилийн турш Монголын төрийг "зайдагнасан" МАН, АН, тэдгээр намын нам дамжсан бүлэглэлийн удирдлагатай (судлаачид ) холбож үзэж байна.
Монгол улсын гадаад өр 28 тэрбум ам.долларт хүрч, Монголын иргэн бүр 23 сая төгрөгийн өрөнд унажээ. Тоо бол хөдөлшгүй үзүүлэлт. Ийм төртэй 30 жилийг үджээ. Нийгэм гажуудаж, клиенталист нийгмийн дүр төрхийг өөртөө шингээжээ. Энэ бол улсын дотор улс үүсгэж, нийгмийн баялгийг цөлмөдөг сонгодог хувилбар болохыг олон улсын эрдэмтэд шинжлэн тогтоосон. Төрийн эрхэнд гарсан улс төрийн нам өөрийн томилгоогоор дамжуулан захиалгат үйлчилгээ авах тогтолцоо. Өөрөөр хэлбэл, томилогдсон эрхтэн дархтнууд нь улс орон, ард иргэдэд үйлчлэх бус, томилсон дарга нартаа л үнэнч байх тогтолцоо. Цагдаа, Шүүх, Прокурор, Цэц, АТГ, Тагнуулийн байгууллага, Сонгуулийн Ерөнхий хорооноос өгсүүлээд "эзэндээ л үйлчилнэ".
Төр засгийн гажуудсан ийм клиенталист тогтолцоо цаашид 4 жил, дахиад 8 жил үргэлжилбэл, Монгол улс бүрэн дампуурна, Венесуэл, Мексикийн араас орно гэж судлаачид, эрдэмтэд түгшиж байна. Ард түмэн сэрж, сэхээрч, эрэл хайгуулд морджээ. "Түмний-76" үндэсний хөдөлгөөн бол улс орноо хөгжүүлэхийг зорьсон эрэл хайгуулчдын нэг юм.
Энэ хөдөлгөөн 2018 оны 9-р сард үүсэж, 10-р сард үйл ажиллагаагаа зарлаж, 11-р сард анхны нэрсээ сонсож эхэлсэн. Иргэдийн итгэл хүлээлгэн нэрлэсэн 5020 хүнээс, удаа дараа шигшиж, 300 нэр дэвшигчийг шалгаруулсан бөгөөд энэ удаад эхний эрэмбийн 152 нэр дэвшигчийг хоёр зэрэглэл болгон А-76, Б-76 жагсаалтыг толилуулж байна. Шигшигдсэн 152 хүний 120 нь эрэгтэй, 32 нь эмэгтэй, тэднээс 42 улс төрч, 35 инженер-эдийн заагчид, бизнес эрхлэгчид 20, хуульч, эрх зүйчид 30, бусад нь багш, эмч, сэтгүүлч, соёл урлаг, спортын зүтгэлтнүүд багтжээ.
Тэднээс УИХ-д огт дэвшиж үзээгүй 69 хүнийг олон нийт зааж нэрлэсэн байна. Энэ нэр, дараалал 2019 оны намар хүртэл дээш доош хөдөлж, 2019 оны 10-р сард эцэслэн зарлагдана. Тэр хүртэл уншигч, үзэгч Та бүхний саналын оролцоотойгоор нэрс нэмэгдэж, хасагдаж, нээлттэй үргэлжилнэ.
Сар бүр санал асуулгыг шинэчлэн зарлах бөгөөд, Control.mn, өдөр тутмын "Үндэсний шуудан" сонин, сар тутмын "People" сэтгүүлд энэ нэрс шинэчлэгдэн хэвлэгдэж байх юм.
"ТҮМНИЙ -76" ҮНДЭСНИЙ ХӨДӨЛГӨӨН 2019 ОНЫ 5-Р САРЫН 29 , УЛААНБААТАР ХОТ
