Дэлхийн аваргад түрүүлдэггүй юм аа гэхэд, найдвартай медальтай ирэх цорын ганц эмэгтэй бөх бол Сумьяа гэж Бүргэдээг хэлж байсныг санаж байна. Үнэхээр ч Сонгинохайрхан дүүргийн Спорт зааланд зохиогдсон УАШТ-ий финалд Сумьяа төвөггүй шалгарсан. Харин аваргын төлөө барилдааны өглөө жин хэмжихэд 700 грамм хэтэрснээр Олон улсын дүрмийн дагуу тэрбээр хасагдаж, дэвжээг төдийгүй, заалыг нулимс дүүрэн орхисон. Түүнд бөхийн мэргэжилтнүүд бүгд харамссан. -Дүрэм тун хатуу. Яах ч аргагүй. Тиймээс бид түүнийг хаслаа гэж МЧБХ-ны ерөнхий нарийн бичгийн дарга Батбаяр хэлж, тайлбарласан. -ДАШТ -д явах болзлоо алдлаа. Тун тоогүй явдал боллоо. Багш нь зөөлөн юм.Дээр нь өөрөө хэнэггүй, хариуцлагагүй юм гэж бөхийн мэргэжилтний хүрээнд харамсах, шүүжлэх, эмзэглэх зэрэгцсэн яриа тэрүүхэн зуур өрнөсөн. Ямар ч гэсэн Сумьяа хэл ам татлан, татлан НурСулТан хотыг зорьж ДАШТ-д зодоглосон ч бас нулимс асгаруулан тэмцээнээ өндөрлөлөө. Тамирчид маань биеийн бэлтгэл сайн хийсэн ч, сэтгэл зүйн бэлтгэл нь дутуу байна гэж дүгнэхэд хүрлээ. Уйлаад яахав дээ, Сумьяа минь. Ухаан байвал түүнийгээ зар.
Э.НОМИН
