Аян замд чамайг хэн нэг нь гомдоовч
Алс хэтдээ хэн нэг нь баярлуулна.
Бүдүүн хадуун үгээр хэн нэг нь гутаавч
Бүлээн халуун үгээр хэн нэг нь баясгана.
Өнөөдөр орсон бороо нь маргааш оройхон зогсоно
Өчигдөр хэлсэн үгэндээ хэн нэг нь гэмшинэ.
Аашилж загнаж хэн нэг нь хараалаа ч
Аргадаж энхрийлж хэн нэг нь ерөөнө.
Уужим сэтгэл дээр чинь ус дусаасан хүмүүс
Уужирч сэхээд цагаан сүүгээр цацал өргөнө.
Жаахан зүрхэнд чинь хэн нэг нь шарх үлдээвч
Жаргах цагт чинь хэн нэг нь түүнийг эдгээнэ.
Яруу найрагч О.Дашбалбар.
Зураг: баруун гар талаас охин Д.Дэжидмаа, О.Дашбалбар, хүү Д.Гангабаатар.
