Өнөөдрийн байдлаар дэлхийн 118 улсад шинэ коронавирусийн халдвар бүртгэгдэж. 119,240 хүн халдвар авж, 4298 хүн халдварын улмаас нас барсан байна. Халдварын голомт болох БНХАУ-тай манай улс 4709 км замаар хиллэдэг хөрш орон учраас Монгол улсад коронавирусийн халдвар тархах эрсдэл маш өндөр байсан. Тиймээс Монгол улсын засгийн газар, холбогдох албаныхан, эрүүл мэндийн байгууллага, ард иргэд энэхүү аймшигт халдвар орж ирэхээс урьдчилан сэргийлж чадах бүхнээ хийж маш ихээр хичээсэн. Гэсэн хэдий ч коронавирусийн халдварыг Монгол улсад оршин суух гадны иргэн зөөн тээвэрлэж орж ирсэнээр халдварын анхны тохиолдол бүртгэгдсэн.
Иймд үүссэн онцгой нөхцөл байдалтай холбогдуулан Засгийн газар, Улсын онцгой комисс, Нийслэлийн онцгой комисс хуралдаж хэд хэдэн шийдвэрүүдийг гаргасан. Тухайлбал: Хот хоорондын зорчих хөдөлгөөнийг хязгаарлав, Нийтийн тээврийн автобусыг тусгай зохицуулалттай үйлчилгээнд явуулах, зарим байгууллага ААН-ийн үйл ажиллагааг түр зогсоох зэрэг халдвараас сэргийлэх бүхий л арга хэмжээг авч, мөн халдвар авсан Франц иргэний амь насийг хамгаалан гэр бүлийг нь элэг бүтэн байлгахын тулд хичээн ажиллаж байна. Цаашид ч хичээх болно.
Иймд иргэд та бүхэн тайван, аюулгүй байдлаа хангаж, олон хүнтэй газраар зорчихгүй, бөөгнөрөл үүсгэхгүй төр засгийн шийдвэрийг даган эрүүл мэндийн байгууллага алба хаагчдын ажил үүргийг хүндэтгэн цахим орчинд элдэв цуу, иргэдийг турхирсан мэдээлэл нийтлэхгүй эв нэгдэлтэй байхыг хүсэж байна.
Т.Хуншагай