Цахим гэмт хэрэг ихэсч байгаа талаар өнөөдөр Цагдаагийн байгууллагаас мэдээлэл хийлээ. Нэр хаяг нь тодорхойгүй хуурамч хаягтай фэйсбүүк хэрэглэгчид гадна, дотны иргэдийн мэдээллийг хакердаж, их хэмжээний мөнгө залилсан хэрэг гарсан байна.
Тухайлбал, 1992 онд төрсөн Т гэгч нь 24 мянга 783 иргэн, аж ахуйн мэдээллийг хакердаж, хууль бусаар авсныг илрүүлэн шалгаж эхэлжээ. Тэрээр компьютерийн мэдээллийн санд байгаа мэдээллийг хуулбарлан авах 12 төрлийн программыг хийсэн байсныг шалгалтын явцад илрүүлсэн байна.
Мөн 1985 онд төрсөн Х гэгч нь гадны иргэдийн виза картыг ашиглан онц их хэмжээний мөнгө завшсан хэргийг шалгаж байгаа аж. Тиймээс иргэд, аж ахуйн нэгжүүд өөрийн мэдээллээ сайтар нууцалж, сошиал орчинд буй тодорхойгүй пост руу орохгүй байх, цахим аюулгүй байдлаа сайтар хангахыг Эрүүгийн цагдаагийн газрын Цахим гэмт хэрэгтэй тэмцэх хэлтэсээс анхаарууллаа.
А.САЯН